Навоий, Наманган ва Андижон вилоятларида ноқонуний йўллар билан ер майдонлари олиб беришни ваъда қилган шахслар қўлга олинди. Бу ҳақда Бош прокуратура ҳузуридаги департамент хабар берди.
Қайд этилишича, департамент ҳамда ДХХнинг Навоий вилояти бошқармалари томонидан тезкор тадбир ўтказилган. Тадбирда фуқаро Х.Й. Кармана туманидаги “К.” фермер хўжалигининг 3 гектар ер майдонини фуқаро Ш.Х.га кадастр ҳужжатларини расмийлаштириб олиб бериши эвазига 28 минг доллар ва 200 миллион сўмни олган вақтида ашёвий далиллар билан ушланган.
Департамент ҳамда ДХХнинг Тўрақўрғон тумани бўлимлари томонидан ўтказилган тезкор тадбирда фуқаро С.К. бошқа бир фуқаро М.К.нинг боғдорчиликка ихтисослашган 27 сотих ер майдонини фуқаро Б.З.га танишлари ёрдамида 15 минг доллар эвазига расмийлаштириб олиб беришини айтиб, олдиндан 3,4 минг доллар ва 7,4 миллион сўмни олган вақтида ашёвий далиллар билан ушланган.
Шу каби, департаментнинг Пахтаобод туман бўлими ДХХ ва ИИБ ходимлари ҳамкорлигида ўтказилган тезкор тадбирда “Б.Қ.” фермер хўжалиги иш юритувчиси Н.Б. фуқаро З.Б.га деҳқон хўжалиги ташкил қилиш учун ажратилган 10 сотих ер майдонини фуқаро Ю.Н.га 8 минг долларга уй-жой қуриш учун сотишга келишиб, гўёки кадастр бўлимида ишловчи танишлари ёрдамида ҳужжатларини расмийлаштириб бериши эвазига 1,6 минг долларни қўлга киритиб, яна 1,4 минг долларни олган вақтида ашёвий далиллар билан бирга ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
- Аввалроқ Сирдарёда беш гектар ер майдонини 40 минг АҚШ долларига сотишга уринган опа-ука қўлга олинган эди.
- Апрель бошларида эса Навоийда 80 гектар ерни 1 миллиард сўмга сотишга уринган шахслар ушлангани,
- Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди.
Изоҳ (0)