“Дарё” сайтига Бектемир тумани “Забардашт” маҳалласи Боғи Эрам кўчасида яшовчи бир гуруҳ аҳоли мурожаат қилиб, ҳокимият вакиллари томонидан уй-жойлари огоҳлантиришсиз бузилаётгани ҳақида маълум қилди. Ушбу мурожаат асосида суриштирув ўтказдик.
Маълум бўлишича, президентнинг 2013 йил 6 августдаги 2020-сонли қарори ва Вазирлар Маҳкамасининг 2013 йил 9 январдаги 4-сонли баёни ижроси асосида Ўрта Чирчиқ туманидаги “Қумовул” ва “Оқ ота” ҚФЙ ҳудудидан ўтувчи Тошкент—Бекобод автомобиль йўлининг кенгайиши ва йўл ёқасида замонавий икки ва уч қаватли бинолар қурилиши муносабати билан қатор турар жойлар “снос”га тушган. Уй-жойлари бузилган фуқароларга 2016 йилда Ўрта Чирчиқ туманининг ўша пайтдаги ҳокими Б.Ибрагимов, 2019 йилда бошқа бир ҳоким О.Нурматовнинг қарори асосида ер участкалари ажратилган.
“2018—2019 йилларда йўл ёқасидаги уйлар бузилганда менга тегишли нотурар бино эвазига менга ҳам 4 сотих ер ажратилган эди. Уни ҳам югуриб-елиб олганмиз. Ўша пайтда ҳокимлик вакиллари келиб, ўзлари қозиқ қоқиб, ажратиб беришган. Энди ҳар ҳоким алмашганда, янги ҳоким келиб, уйингни бузаман, деб қўрқитади. Биз ўшанда кадастр қилмоқчи бўлганимизда, тўхтанглар, Тошкент вилоятидан шаҳарга, Бектемирга ўтяпсизлар, шундан кейин ҳужжат қиласизлар, дейишган эди. Шу билан аросатда қолиб кетдик.
Йиллар давомида кредит олиб, уй қурдик, лекин яна ҳоким ўзгариши ортидан огоҳлантирмасдан уйларни бузишга тушди. Айрим бузилган уйларнинг ичида одамлар яшаётган бўлган”, дейди мурожаатчилардан бири Нодира Солиева.
Бу ерда шу пайтгача 148 та хонадон қурилган ва уларнинг 50 фоизидан ортиғи кўчиб келган. Уй қурганлар орасида ҳокимият ер ажратганлардан ташқари, ерни бошқалардан сотиб олганлар ҳам бор. Аҳоли вакилларининг таъкидлашича, ҳокимият қўлида биноларни бузишга оид суд қарори ёки бошқа бирор-бир ҳужжат йўқ. Шунчаки махсус техника олиб келиниб, одамлар огоҳлантирилмасдан, бузиш бошланган. Бузишга қаршилик қилганлар эса ички ишлар ходимлари томонидан автобусларга солиб, олиб кетилган.
Вазиятга ойдинлик киритиш мақсадида Бектемир ҳокимиятига келдик. Ҳар қанча ҳаракат қилмайлик, бизни ҳоким билан учрашишимизга йўл қўйишмади. Ҳокимият қурилиш бўлими бошлиғи Шерзод Алтмишов ва туман кадастр агентлиги мутахассислари Сардор Иноғомов ва Ислом Жалиловлар вазиятга муносабат билдиришди.
“Забардашт” маҳалласи 2019 йилда Бектемир тумани ҳудудига ўтган. Унгача Ўрта Чирчиқ тумани ҳудудида бўлган. Ҳозирги кунда маҳалладаги 13 гектар ер майдонида 148 та ноқонуний уй-жойлар қуриляпти.
Биз фуқароларни огоҳлантириш мақсадида маҳаллага бордик. Одамларга ҳокимият ва кадастр агентлиги томонидан огоҳлантириш берилган, лекин биз у ерга борганимизда фуқаролар йўқ эди. Одамлар яшамаса, огоҳлантириш хатини деворга ёпиштириб кетмайман-ку? Усталар ишлаяпти, лекин уй эгаларини топиб бўлмайди. Одамларнинг қўлида ҳеч қандай ҳужжат йўқ”, дейди туман қурилиш бўлими бошлиғи Шерзод Алтмишов.
Ҳокимият вакиллари фуқаролар қурган биноларни бузишга асос бўладиган бирор ҳужжат тақдим эта олмади. Айтилишича, фуқароларга огоҳлантириш Вазирлар Маҳкамасининг 467-сонли қарори асосида берилган.
Туман кадастр агентлиги мутахассислари Сардор Иноғомов ва Ислом Жалилов ҳолатни изоҳлар экан, бу ҳудуд Ўрта Чирчиқдан Бектемир тумани тасарруфига “қишлоқ хўжалиги ери” сифатида ўтганини таъкидлади. Шу боис фуқароларга кадастр ҳужжати расмийлаштириб берилмайди.
“Ҳоким қарори асосида ер ажратилганда, ўлчаб, бўйи, эни, кенглиги қанча, бичиб олинади ва қозиқ актлари тузилади. Ҳар бир ҳоким қарори билан бирга қозиқ актлари ҳам берилади. Биз ана шу икки ҳужжат асосида кадастр расмийлаштириб беришимиз керак. Аммо ҳеч қайси фуқарода қозиқ акти йўқ. Яъни, майли, бу ер қишлоқ хўжалигиники эмас, деб ҳисоблайлик. Лекин биз қайси фуқарога айнан қаердан ер ажратилганини қаердан биламиз?
Бу одамлар нима қилиши керак эди? Ҳоким қарори чиққан, қозиқ актини олиб, кадастр органларига мурожаат қилиши керак эди. Ўшанда уларга ер плани тайёрланиб, давлат рўйхатидан ўтказиларди. Ана шундан кейин уй қуришни бошлаганида, ҳеч қандай муаммо келиб чиқмаган бўларди”, дейди Ислом Жалилов.
“2019 йил 6 декабрда қабул қилинган 3933-сонли ҳоким қарори прокурор протести сабабли бекор қилинган. Чунки қарорда умумий ер майдони кўрсатилган, лекин фуқаролар рўйхати йўқ. Шу боис суғориладиган ер майдонларида уй-жой қурилгани ҳолати бўйича маълумотлар туман, шаҳар ва республика прокуратурасига киритилган. Йиллар давомида фуқаролар огоҳлантирилганига қарамай, ноқонуний қурилмалар сони ортиб бормоқда ва уларнинг сони 148 тага етди”, деди Сардор Иноғомов.
Тўғри, қонун ҳамма учун баробар ва уни билмаслик фуқарони жазодан озод қилмайди. Аммо фуқаро мурожаатида айтилганидек, аҳолини огоҳлантирмай уйини бузиш инсонийликка ҳам тўғри келмайди. Хўш, бунга ҳокимлик вакили қандай муносабат билдиради?
“Бузилган уйларнинг ҳеч бирида аҳоли яшамайди. Фақатгина усталар ишлаётган экан. Бузишдан аввал уларни ташқарига чиқардик. Фуқароларни огоҳлантириш учун ҳудудга чиққанимизда ҳеч ким йўқ эди. Деворига ёпиштириб кетмаймиз-ку”, дейди туман қурилиш бўлими бошлиғи Шерзод Алтмишов.
Кўриб турганингиздек, вазият чигал ва мураккаб. Аҳоли ҳам, ҳокимият ҳам ўзини ҳақ деб билади. Катта эҳтимолки, ер майдонининг бир тумандан бошқа бир туманга ўтиши жараёнида йўл қўйилган техник хатолар ана шундай тушунмовчилик ва можароларга сабаб бўляпти. Ўйлаймизки, ушбу масала ҳукумат ва тегишли органлар томонидан қайта ўрганилади ва адолатли ечим топилади. Мавзуга яна қайтамиз.
Изоҳ (0)