Кеча ижтимоий тармоқларда Тошкент шаҳрининг собиқ Сергели, айни кундаги Янгиҳаёт туманида жойлашган “Йўлдош” массивидаги ёғоч уйлар бузилиши, ўрнида кўп қаватли уйлар қад ростлаши мумкинлиги ҳақида хабарлар тарқалганди.
“Дарё” журналисти вазиятга аниқлик киритиш мақсадида собиқ “Спутник” массивида бўлиб, аҳоли вакиллари ва масъулларга микрофон тутди.
Ёғоч уйларда яшовчи аҳолининг маълумот беришича, мавжуд 409 та уй Тошкентда содир бўлган зилзиладан сўнг, 1967—1968 йилларда қурилган бўлиб, вақтинча 5 ёки 10 йил муддат яшаш учун қурилган. Айни кунга келиб уйлар яшаш учун яроқсиз ҳолга келган.
Қачон кўчиришади дея бу янгиликни ўн йилдан бери кутяпмиз. Аслида яккасаройликман. 2016 йил шу уйлардан сотиб олгандим. Ўша пайтда ҳам шу гап бор эди. Мен саводли одамман, тошкентликман. Цивилизация марказида яшаганман. Уйим евроремонт. Лекин атроф сасиб ётибди. Яшаб бўлмайдиган даражадаги уйлар бўлиб қолди. Тушуняпсизми “сантехника”, “канализация” — ҳаммаси ёмон. Биз дарахтларни кесиб ташланг демаяпмиз. Лекин шу дарахтлар учун шунча одам хароба жойда яшашимиз керак эмас-ку. Тўқсон фоиз аҳоли яхши яшаш учун янгилик кутмоқда, дейди ёғоч уйлардан бирида яшовчи Жаҳонгир Ғиёсов.
Ёғоч уйларда саккиз йилдан бери яшаб келаётган, аммо шахсини очиқлашни истамаган фуқаронинг айтишича, улар янги уйлар транспортлар қатнови қулай бўлган ҳудудда жойлашишидан умидвор.
Яхши шароит қилиб беришса, кўчишга рози бўламиз, албатта. Аммо янги уйлар ҳам яшаётган жойимизга ўхшаб шароитлари яхши, шаҳар марказида бўлса деймиз. Ҳозирча уйлар қаердан берилади, қай тартибда берилади бу ҳақда бизга ҳеч ким ҳеч нарса демади. Фақат қўни-қўшнилардан кўчирилар эканмиз деб эшитдик, дейди у.
“Дарё” журналисти билан суҳбатда бўлганларнинг айтишича, ёғоч уйларда яшовчилар уйининг эскилиги, харобалиги ва яшаш шароитининг оғирлиги сабаб меҳмон кутишга қийналади. Қиз узатиб, тўй қилиш ҳам муаммо эканини айтишмоқда.
Шароит сҳинданам ёмон. Совет Иттифоқи бу уйларни ўн йилга деб қурганди. Шу уйларда яшовчи 90 фоиз аҳоли янги уй берилишини кутмоқда. Тан олиш керак бу уйларда тўй ҳам қилиб бўлмайди. Подъезднинг аҳволини кўриб, совчи ҳам келмайди. Қизимни узатаман деб, бошқа жойга кўчиб тўй қилганлар ҳам бор. Масалан оддий кир ювадиган машина олиб, уйни ишлатолмаймиз. Трубалар эски, ёрилиб кетган. Томлардан чакка ўтади, дейди аҳоли вакилларидан бири.
Суҳбатдошларнинг айримлари улар яшаётган ҳудуд дарахтзор бўлгани учун салқин ва ҳавоси тоза эканини айтиб, кўчиш нияти йўқлигини таъкидламоқда.
Бизга мана шу ёғоч уйлар ёқади. Қулайликлари бор. Биз бу ерга мослашиб кетганмиз. Ҳамма нарса қулай. Масалан ёзда энг салқин жой. Одамлар кўчада юришга қийналмайди. Янги домларга кўчишни кимдир яхши, кимдир эса ёмон дейди. Менинг шу ерда қолгим келяпти. Агар пул масаласини ҳал қилса, мен қолмоқчиман. Мана шу ёғоч уйларни чиройли қилиб, ташқарисини кўкаламзорлаштиришса, яхши бўларди, дейди суҳбатдош.
Ўзини Фурқат Абдураҳимов деб таништирган фуқаронинг айтишича, ёғоч уйларнинг 90 фоизи “авария” ҳолатида.
Бу уйлар бузилса, бизга янги уйлар беришса яхши бўларди. Боиси бу ердаги “дом”ларнинг ҳаммаси авария ҳолатида. Деярли тўқсон тўққиз фоизида яшаб бўлмайди. Таракан, клапа босиб кетган, дейди у.
Навбатдаги суҳбатдош Зулхумор Абдуллаеванинг айтишича, уйларнинг ёғочи чирий бошлагани сабаб, юқори қаватда яшовчилар чўмилаётган пайтда ёғочлар ёрилиб, пастга тушиб кетиш ҳолатлари ҳам бўлган.
Бу уйларда яшаётганимизга ўн йилдан ошди. Уйларнинг қурилганига эса 58 йил бўлди. Мажбурият ва тақдир тақозоси билан келиб қолганмиз. Яшашнинг иложи йўқ, ҳозир уйларимиз қийшайиб кетган, чўкмоқда. Каламушлар чиқади. Яшаб бўлмайдиган даражага етиб қолган. Менга қолса, бир кун ҳам яшамасдим. Хўжайинимиз ўтиб кетган, ўғлим йўқ. Ҳозир иккита неварам билан тураман. Уйлар кичкина, тўғри, яшаганмиз, Лекин энди яшаб бўлмайдиган даражага етиб қолган. Шунинг учун янги “дом”лардан уй беришса деймиз, дейди Зулхумор опа.
Ёғоч уйларда яшовчи аҳволи вакилларидан яна бири 74 ёшли Назира Тожибоеванинг маълумот беришича, Сергели номининг келиб чиқиши корейс миллатига мансуб одам Сергей Ли номи билан боғлиқ.
Бу уйлар Тошкентдаги ер силкинишидан кейин, 1966 йиллардан сўнг тезликда қурилган уйлар ҳисобланади. Бошида чўл бўлиб ётган жой эди. Сергели номининг келиб чиқиши ҳам Сергей Ли деган корейс миллатига мансуб одамнинг номи билан боғлиқ. Бу жойлар чўл бўлган. Ўша пайтда тезлаштирилган ҳолда тахтадан қуришган. Зилзила сабаб уйидан ажралганлар кўчиб кела бошлаган. Кўпгина одамларга бундан кейин яна яхши уйлар берилган. Лекин бу уйлар ҳам бузилмай, фойдаланиш учун олиб қолинган. Бу уйлар қисқа муддат яшаб туриш учун қурилган. Дастлаб беш-ўн йилнинг ўзида бузилади, деб ўйлашган. Лекин одамлар шу пайтгача яшаб келяпти. Уйнинг тахталари жуда эски ва тушиб кетмоқда. Менга ҳам уй беришса, кўчиб ўтардим, дейди 77 ёшли суҳбатдош.
Пойтахт ҳокимлиги ҳузуридаги Тошкент Инвест компаниясининг маълумот беришича, ёғоч уйларда яшаётган аҳоли “Йўлдош” массивидан 1,5 км узоқликдаги “Гулшонобод” маҳалласига кўчирилади.
Камера қаршисида гапиришни истамаган Янгиҳаёт туман ҳокими ўринбосарига кўра, 409 та хонадон эгалари янги хонадонларга кўчиб ўтгач, эски уйлар бузилади. Аммо уларнинг ўрнида ҳеч қандай янги уйлар қурилиши режалаштирилмаган. 72 гектардан иборат майдондаги дарахтлар сақлаб қолиниб, эски уйлар ўрнида боғ бўлиши айтилмоқда.
Изоҳ (0)