Қишнинг биринчи ойи одатда совуқ ва қорли об-ҳаво билан кузатилади. Бироқ Ўзбекистонда декабрь ойи ҳар доим ҳам шундай бўлмайди. “Ўзгидромет” 2024 йилнинг декабрида қандай об-ҳаво кутилаётганини маълум қилди.
Прогнозларга кўра, ойнинг биринчи ўн кунлигида Ўзбекистон ҳудуди бўйича ҳарорат тартиби ўртача кўп йиллик қийматларга яқин бўлади. Ҳаво ҳарорати асосан кечалари 3 даража совуқ-2 даража илиқ, кундуз кунлари 3-8 даража илиқ, баъзи жойларда 10 даражагача илиқ, шимолда кечалари 3-8 даража совуқ, кундуз кунлари 2-7 даража илиқ атрофида бўлиши кутилмоқда.
1 декабрда республика бўйича баъзи жойларда ёғингарчилик (ёмғир, айрим жойларда қорга айланиши мумкин) бўлади. 2 декабрда айрим тоғли ҳудудларда бир оз қор ёғиши кутилмоқда.
Кейинчалик деярли биринчи ўн кунликнинг охиригача (3—8 декабрь) Ўзбекистон ҳудуди бўйича асосан қуруқ об-ҳаво кузатилади ва фақат ўн кунлик охирида (9—10 декабрь) республика бўйича баъзи жойларда ёғингарчилик бўлиши мумкин.
Декабрь ойининг иккинчи ва учинчи ўн кунликларида ҳарорат кечалари 0-5 даража совуқдан 2-7 даража илиққача, кундуз кунлари 3-8 даража илиқдан 10-15 даража илиққача ўзгариб туради, ой охирида ҳарорат кечалари 5-10 даража совуққача, кундуз кунлари 0-5 даража совуққача пасаяди.
Шимолда ҳарорат кечалари 8-13 даража совуқдан, баъзи жойларда 15-17 даража совуқдан 3даража совуқ-2 даража илиққача, кундуз кунлари 2 даража совуқ-3 даража илиқдан 3-8 даража илиққача ўзгариб туради.
Ўтган йилнинг декабри ойи қиш учун хос бўлмаган илиқ об-ҳаво билан бошланганди. Ойнинг биринчи ҳафтаси Ўзбекистонда ёғингарчиликсиз ўтганди. Иқлимшунос Эркин Абдулаҳатов “Дарё” мухбири билан суҳбатда Ўзбекистонда қиш фаслининг илиқ кечиши қишлоқ хўжалигига жиддий зарар етказиши, қолаверса, инсонлар саломатлигига ҳам хавф туғдиришини айтганди.
Изоҳ (0)