Куз келиб, ҳаво ҳарорати секин-асталик билан пасайиб бормоқда. Бу вақтда иммунитет ҳам тушиб, шамоллашга мойиллик ошади. Хўш, кузда қўзғаладиган касалликларнинг олдини олиш учун нима қилиш керак? Қуйида сизга оддий ва содда, бироқ юқори самарали тавсиялар ёрдам беради.
Термо кийим кийинг
Кузда баданни совуқдан асрашга алоҳида эътибор бериш керак. Чунки иссиқдан совуққа ўтаётганда исталган кишида маълум бир ўзгаришлар бўлади. Бу даврда кўпчиликда асосан, юқори нафас йўллари касалликлари ёки аллергик касалликлар пайдо бўлади. Албатта, ўта қалин кийиниш шарт эмас, чунки совуқда терлаган баданнинг шамоллаш эҳтимоли деярли 100% гача ошади.
Аммо фасл ва об-ҳавога мос равишда кийинмасак ҳам турли инфекцияларга организм бардошлилиги камайиши муқаррар. Бундай ҳолатда термо кийимлар ёрдам беради. Сифатли термо кийим танани терлатмайди, баданни иссиқ ва қуруқ сақлайди.
Қалпоқ ва шарф кийишни канда қилманг
Болаликда кўпчилик қалпоқ кийишни ёқтирмаган. Мактабга йўл олган болалар уйидан узоқлашиши билан қалпоғини ечиб ташлаганига ҳам гувоҳи бўлганмиз. Совуқ кунларда бош ва бўйин қисми ҳимояланмаса, бу танадаги кўплаб жараёнлар учун масъул бўлган миянинг яллиғланишига, қулоқлар шамоллашига олиб келиши мумкин.
Уйқу режимига амал қилинг
Балки ушбу лайфхак кулгили туюлар, аммо уйқуга тўйиш ҳам организмнинг турли инфекцияларга чалинишига қаршилигини оширади. Уйқунинг етишмаслиги иммунитетни заифлаштиради, натижада вируслар танага осонгина кириб боради. Шу сабабли кузда мунтазам равишда яхши ухлаш муҳимдир.
Ўзингизни тетик ва соғлом ҳис қилиш учун қанча уйқу кераклигини кўриб чиқинг ва ушбу тартибга риоя қилинг. Ётишдан олдин хонани шамоллатишни унутманг, чунки бу дам олишга ва ташвишли фикрлардан халос бўлишга ёрдам беради.
Кўпроқ витаминлар ва камроқ ширинликлар истеъмол қилинг
Бизнинг иммун тизимимиз ўзига хос, у генимиз, атроф-муҳит, истеъмол қилаётган озиқ-овқатлар ва биз дуч келадиган микроблар таъсирида яралади. Кузда организмни касалликлардан ҳимоя қилиш учун кўпроқ витаминларга бой янги сабзавот ва мевалар истеъмол қилинг, ширинликларни чекланг.
Қизиқарли факт: Лома Линда университети олимлари шакарни суиистеъмол қилиш иммунитетнинг патоген бактериялардан ҳимоя қилиш учун жавоб берадиган қон ҳужайралари фаолиятига салбий таъсир кўрсатишини исботлаган. Агар ширинлик ейишни истасангиз, бирор ҳўл мева билан тамадди қилишингиз мумкин.
Қўлларингизни тез-тез ювинг ва дезинфекция қилишни унутманг
Ушбу маслаҳат нафақат куз учун, балки йилнинг исталган вақти учун ҳам мос келади, чунки қўллар барча турдаги вируслар ва бактерияларнинг энг хавфли ташувчиси ҳисобланади.
Нафақат овқатланишдан олдин, балки ҳар сафар гавжум жойларга, масалан, жамоат транспортидан фойдалангандан кейин, шунингдек, жисмоний алоқадан кейин — қўл бериб кўришишда уларни ювишга одатланиш керак. Бундан ташқари, вируслар эшик тутқичлари, уяли телефон, компьютер клавиатуралари ва албатта, пулда жуда ҳам кўп бўлади. Шунинг учун қиш ва кузда қўлларни тез-тез ювиш саломатлик учун фойдалидир.
Айниқса, офисда ишлайдиганлар эшик тутқичлари, иш столининг юзаси, микротўлқинли печнинг ва кун давомида жуда кўп одамлар тегадиган жойларни дезинфекцияловчи восита ёки ҳеч бўлмаганда спиртли салфетка билан артиб олиши зарур. Тозалашга сарфланган бир неча сония ҳам соғлиқни асрашга ёрдам беради.
Малинали мураббо қўшиб чой ичинг
Малина резавори суперфуд ҳисобланиб, турли касалликларнинг олдини олиш ва даволашда қўлланади. Масалан, малинадаги антиоксидантлар ва фитонутриентлар иммунитетни оширади, салицил ва фолий кислоталари ЎРВИдан тезроқ халос бўлишга ёрдам беради. Дарвоқе, шамоллашга қарши малинали мураббодан чой тайёрлаганда уни қайноқ сувга эмас, балки ўртача иссиқликдаги сувга солиш лозим, акс ҳолда малинанинг фойдали хусусиятлари йўқолади.
Бундан ташқари, малинали чой микробларга қарши курашиш хусусиятларга эга ва таркибидаги витаминлар ва минераллар қувватни тиклашга ва иммунитет тизимини мустаҳкамлашга ёрдам беради.
Камроқ асабийлашишга ҳаракат қилинг
Ҳа, бу осон эмас, лекин ҳаётингиздаги стресс миқдорини камайтиришга ҳаракат қилишингиз керак. Маълумки, асабийлашиш туфайли нерв тизими жуда заифлашади, бу эса тананинг турли вируслар ва инфекцияларга нисбатан заифроқ бўлишига олиб келади.
Изоҳ (0)