Бугун, 16 февраль куни Қорақалпоғистон ва Навоий вилояти шимолида ҳаво ҳарорати 11–17 даражагача совиди. “Ўзгидромет” кун давомида совуқ ҳаво массалари республиканинг барча ҳудудларини қамраб олишини маълум қилди.
Прогнозларга қараганда, 17–19 февраль кунлари Сурхондарё, Қашқадарё ва Фарғона водийси вилоятларида тунлари ҳаво ҳарорати минимумлари 0 даражадан -5 даражагача пасайиши мумкин.
Иқлимшунос Эркин Абдулаҳатовнинг ёзишича, бу кучли совиш ҳисобланмайди.
“Мазкур вилоятларда асосий қишлоқ хўжалик экин майдонлари борлигини инобатга олсак, кутилажак арктик совуқ оқим республика жануби ва водий вилоятларига чуқур таъсир кўрсатмаслигини тушуниб етиш мумкин. Аммо эрта вегетацияни бошидан ўтказаётган жануб вилоятлари учун кучсиз совуқ уриш ҳам экин ва боғдорчиликда ҳосилнинг кўпроқ йўқотилишига олиб келишини унутмаслик керак”, — дея фикр билдирган мутахассис.
Ўрганишлар 16–19 февраль кунлари мамлакатнинг деярли барча ҳудудларида ёғингарчилик кузатилишини кўрсатган. Хусусан, бугун Тошкент шаҳрида, шунингдек, Тошкент, Жиззах, Сирдарё ва Фарғона водийси вилоятларида ёмғир ёғиб, қорга айланиши кутилмоқда. 17–18 февраль кунлари Бухоро, Навоий, Самарқанд, Жиззах, Қашқадарё ҳамда Сурхондарё вилоятларида қор ёғади.
Қиш илиқ келиши ортидан Ўзбекистонда бодом, ўрик, шафтолилар гуллаб юборган. Ҳавонинг илиши дарахтларни қишки уйқуга кетадиган пайтда гуллатиб юборса, бирдан совуқ бўлиши ортидан бевақт “уйғониб”, гуллаб юборган дарахтлар ҳосилидан айрилади. Қолаверса, айрим сабзавотларни ҳам соқуқ уриш хавфи сақланиб қолмоқда.
Мутахассислар ҳавонинг совиши март ойида мамлакатнинг жанубий ҳудудларида йиғиб олинадиган пиёз, карам ва сабзи каби эртапишар сабзавотларнинг ҳосилига таҳдид солади. Бундан ташқари, донли мевалар ва ёнғоқлар ҳосилининг бир қисми ҳам хавф остида. Яъни совуқ ҳаво оқимининг кескинлашуви қишлоқ хўжалиги ва яйловлар учун оғир шароит юзага келтиради.
Вазиятдан келиб чиқиб, Қишлоқ хўжалиги вазирлиги экинларни совуқдан асраш бўйича тавсия ва маслаҳатларини берди. Хусусун, дарахтлар ва ўсимликларни совуқ уриши ва қордан ҳимоя қилиш учун махсус материаллар (мато, плёнка, крафт-қоғоз, спанбонд) билан ёпиш зарур. Бу гуллайдиган куртакларни қисқа муддатли қаттиқ совуқдан сақлаб қолишга ёрдам беради.
Шу билан бирга, совуқ ҳаво массаси кириб келишидан олдин дарахтлар етарли даражада суғорилган ва озуқа олган бўлиши керак.
“Экинлар илдиз зонасини махсус озуқа моддалар билан қоплаш тупроқдаги иссиқлик ва намликни сақлаб қолишга ёрдам беради. Бу эса илдизларни совуқдан ҳимоя қилади”, — дея маълум қилган вазирлик.
Шунингдек, қишлоқ хўжалиги соҳаси вакилларига дарахтлар ва ўсимликлар атрофида вақтинчалик шамол тўсиқларини яратиш ҳам тавсиф этилган. Бу тўсиқлар экинларни елвизаклардан асрашга ёрдам бериши эслатилган.
Умуман олганда, мева-сабзавотларнинг қай даражада ҳосил бериши қишнинг кейинги “қадамларига” ва об–ҳаво шароитларига мос равишда кўрилган чораларга боғлиқ бўлиб қолмоқда.
Изоҳ (0)