Qishning birinchi oyi odatda sovuq va qorli ob-havo bilan kuzatiladi. Biroq O‘zbekistonda dekabr oyi har doim ham shunday bo‘lmaydi. “O‘zgidromet” 2024-yilning dekabrida qanday ob-havo kutilayotganini ma’lum qildi.
Prognozlarga ko‘ra, oyning birinchi o‘n kunligida O‘zbekiston hududi bo‘yicha harorat tartibi o‘rtacha ko‘p yillik qiymatlarga yaqin bo‘ladi. Havo harorati asosan kechalari 3 daraja sovuq-2 daraja iliq, kunduz kunlari 3-8 daraja iliq, ba’zi joylarda 10 darajagacha iliq, shimolda kechalari 3-8 daraja sovuq, kunduz kunlari 2-7 daraja iliq atrofida bo‘lishi kutilmoqda.
1-dekabrda respublika bo‘yicha ba’zi joylarda yog‘ingarchilik (yomg‘ir, ayrim joylarda qorga aylanishi mumkin) bo‘ladi. 2-dekabrda ayrim tog‘li hududlarda biroz qor yog‘ishi kutilmoqda.
Keyinchalik deyarli birinchi o‘n kunlikning oxirigacha (3—8-dekabr) O‘zbekiston hududi bo‘yicha asosan quruq ob-havo kuzatiladi va faqat o‘n kunlik oxirida (9—10-dekabr) respublika bo‘yicha ba’zi joylarda yog‘ingarchilik bo‘lishi mumkin.
Dekabr oyining ikkinchi va uchinchi o‘n kunliklarida harorat kechalari 0-5 daraja sovuqdan 2-7 daraja iliqqacha, kunduz kunlari 3-8 daraja iliqdan 10-15 daraja iliqqacha o‘zgarib turadi, oy oxirida harorat kechalari 5-10 daraja sovuqqacha, kunduz kunlari 0-5 daraja sovuqqacha pasayadi.
Shimolda harorat kechalari 8-13 daraja sovuqdan, ba’zi joylarda 15-17 daraja sovuqdan 3daraja sovuq-2 daraja iliqqacha, kunduz kunlari 2 daraja sovuq-3 daraja iliqdan 3-8 daraja iliqqacha o‘zgarib turadi.
O‘tgan yilning dekabri oyi qish uchun xos bo‘lmagan iliq ob-havo bilan boshlangandi. Oyning birinchi haftasi O‘zbekistonda yog‘ingarchiliksiz o‘tgandi. Iqlimshunos Erkin Abdulahatov “Daryo” muxbiri bilan suhbatda O‘zbekistonda qish faslining iliq kechishi qishloq xo‘jaligiga jiddiy zarar yetkazishi, qolaversa, insonlar salomatligiga ham xavf tug‘dirishini aytgandi.
Izoh (0)