“Yovvoyi robot” filmi tasodifan yovvoyi orolga tushib qolgan Roz ismli robot haqida hikoya qiladi. Ushbu ajoyib va ta’sirli hikoya ko‘plab tomoshabinlarni o‘ziga jalb etdi. Unda robot timsolida insoniylik tuyg‘usini saqlash qanchalik muhim ekanligi aks etgan. Ammo bunday ruhdagi animatsion filmlar avval ham ko‘p suratga olingan.
Quyida zamonaviy texnologiya va atrofdagi olam o‘rtasidagi uyg‘unlik, o‘zaro tushunish va ezgulik mavzulari yoritiladigan va sizni o‘ylashga majbur qiladigan beshta eng yaxshi animatsion filmlarni taqdim etamiz.
“Temir gigant” (1999)
Amerikaning sokin provinsiyasi aholisi ko‘zni qamashtiruvchi chaqnash va ulkan uchuvchi jismning qulashiga guvohi bo‘ladi. Bir necha kundan keyin Hogart Hyuz ismli bola uzoq galaktikadan Yerga uchib kelgan ulkan robotni uchratadi va unga harbiy xizmatdan qochishga yordam beradi. Mahalliy aholi robotni yer yuzi uchun tahdid deb biladi, ammo asta-sekin robot vayronkor emas, balki himoyachi bo‘lishni o‘rganadi.
“Yovvoyi robot” ham, “Temir gigant” ham texnologiya qanday qilib insoniyat dunyosining bir qismiga aylanishi mumkinligini yoritadi. Roz va Gigant ikkisi mashina holatidan tanlash qobiliyatiga ega mavjudot darajasiga ko‘tariladi.
“Vall-I” (2008)
Mazkur animatsion filmda insoniyat Yerni tark etadi va kosmosga uchadi. Kichkina Vall-I esa sayyorani axlatdan tozalaydigan yagona robotga aylanadi. Biroq robot uni kelajakda qanday voqealar kutayotganini bilmaydi. Multfilm davomida Vall-I yangi do‘stlar bilan uchrashadi, kosmosga uchadi va hattoki “Aksioma” layneri orqali Yerni tark etgan insonlarni ortga qaytaradi.
“Yovvoyi robot” va “Vall-I” zamonaviy texnologiya, tabiat va ekologiya mavzularini birlashtiradi. Ikkala qahramon dunyoga yaxshilik olib kelish va insonparvar bo‘lishni o‘rganadi.
“Kubo. Samuray afsonasi” (2016)
Kubo — buyuk tarixga ega oilaning merosxo‘ri bo‘ladi, lekin o‘tmishdagi ruhlar qasos olish uchun qaytib kelganida uni faqatgina bir juft qo‘riqchi — qayta tirilgan maymun va qo‘ng‘iz samuraylari himoya qilishga jur’at etadi.
Roz singari, Kubo ham o‘zligini va atrofidagi dunyoni o‘rganib, murakkab yo‘llarga to‘la qiziqarli sayohatni boshdan kechiradi. Ikkala qahramon ham ilgari begona deb hisoblaganlar orasidan do‘st topadi va yovuzlik bilan kurashda tabiatga tayanish kerakligini o‘rganadi.
“Qahramonlar shahri” (2014)
Daho ixtirochi Hiro Hamada ukasini yo‘qotadi, lekin tez orada ajoyib tibbiyot roboti — paxmoq Beymaks bilan do‘st tutinadi. Ular birgalikda yovuz kuchni mag‘lub etish uchun qahramonlar jamoasini yig‘adi.
“Yovvoyi robot” va “Qahramonlar shahri” animatsion filmlarida yo‘qotish, do‘stlik va qiyin damlarda bir-birini qo‘llab-quvvatlash kabi mavzular ko‘tariladi. Beymaks ham xuddi Roz kabi oddiy mashina bo‘lishni o‘rganadi.
“Kells siri” (2009)
12 yoshli Brendan Irlandiyadagi amakisi boshqaradigan Kells abbatligida yashaydi. Rohiblar o‘zlarini vikinglar bosqinidan himoya qilish uchun ko‘p vaqtlarini baland devor qurishga sarflaydilar. Ammo bir kuni talon-toroj qilingan monastirdan qochgan Aydan ularning oldiga keladi va nihoyatda chiroyli kitob olib keladi. Kitobni illyustratsiyalar bilan to‘ldirish Brendanning zimmasiga tushadi.
Ikkala multfilmda tabiat va madaniyat o‘rtasidagi bog‘liqliklar o‘rganiladi. Roz singari Brendan ham san’at va tabiatni birlashtiradigan yangi dunyoni kashf etadi.
Izoh (0)