“Кунг-фу панда-4” фильми Америка кинопрокатининг етакчиси деб топилди

“Кунг-фу панда-4” франшизаси намойишининг илк кунларидаёқ 58,3 миллион доллар даромад келтирди ва Америка кинопрокатида биринчи ўринни эгаллади. Бу ҳақда “Правила жизни” нашри хабар бермоқда.

Янги анимацион фильм ўзининг иккинчи (47,6 миллион доллар) ва учинчи (41,2 миллион доллар) қисмларидан ҳам юқорироқ кўрсаткичга чиқди ва франшиза дебютининг муваффақиятига яқинлашди. “Кунг-фу панда” мультфильмининг биринчи қисми 2008 йилда 60 миллион доллар миқдорда пул ишлаб топган эди.

“Кунг-фу панда-4”нинг премьераси 2024 йил 8 март куни бўлиб ўтди ва мультфильм бир вақтнинг ўзида АҚШнинг 4035 та кинотеатрида дебют қилди. Асар кўпроқ оммавий томошабинларга манзур бўлди. Унинг рейтинги Cinema Score бўйича А га етди.

Universal Pictures кинокомпаниясининг маҳаллий прокат бўйича президенти Жим Орр мазкур оилавий фильмнинг давомини томошабинлар узоқ вақт давомида интиқлик билан кутганини таъкидлади. Шунингдек, жаҳон кинопрокатида “Кунг-фу панда-4” яна 22 миллион доллар фойда олди ва умумий ҳисобда 80 миллион доллардан ортиқ даромадга чиқди.

Март ойининг бошларида АҚШда энг кўп кўрилган фильмлар рейтингида иккинчи ўринни “Дюна-2” фильми эгаллади (46 миллион доллар).

“Хаёлий дўст” фильми 3118 та кинотеатрда намойиши орқали ўн миллион доллар фойда олди ва Америка кинопрокатидаги кучли учталикка кирди. Тўртинчи ўринни “Кабрини” биографик фильми (7,6 миллион доллар) ва бешинчи ўринни “Боб Марли: ягона муҳаббат” биографик драмаси эгаллади.