Хитойдаги компаниялардан бири вазн йўқотган ходимларга ҳар бир ташланган 500 грамм учун 500 юан (тахминан 70 доллар) тўлайди. Бу ҳақда Shanghai City News Service хабар берди.
Ташаббус Инста360 камералар ишлаб чиқарувчи компанияга тегишли. Улар ходимлар учун “Оз ва пул топ” номли челленжни йўлга қўйган. Бироқ қоидага кўра, вазн орттирган ходимлар компанияга пул тўлайди. Ҳар бир ортган 500 грамм учун 800 юан (112 доллар) ундирилади.
Акцияда 99 нафар ходим иштирок этиб, жами 950 килограмм вазн йўқотган. Улар умумий 1 миллион юан (139 минг доллар) мукофот олган. Ҳеч ким жаримага тортилмаган.
Инста360 вакилларининг таъкидлашича, лойиҳа соғлом турмуш тарзини оммалаштириш, ходимларда ҳаёт ҳамда ишга ижобий муносабатни шакллантиришга қаратилган. Ташаббус ижтимоий тармоқларда катта қизиқиш уйғотган. Кўплаб фойдаланувчилар ўз компанияларини ҳам шундай амалиётни жорий этишга чақирган.
Бунгача Гуандун провинциясидаги озиқ-овқат қўшимчалари ишлаб чиқарувчи Wоnderlab компанияси ҳам бир ойлик вазн йўқотиш танловини ўтказган эди. Унда 224 ходим жами 750 килограмм вазн йўқотиб, 171 минг юанни (23,8 минг доллар) бўлиб олган. Рекорд ўрнатган иштирокчи эса 16,4 килограмм вазн ташлаб, 7600 юан (1059 доллар) ишлаб топган.
Бу каби дастурлар Хитой Соғлиқни сақлаш миллий комиссиясининг вазнни илмий назорат қилиш ва семиришга қарши кураш бўйича 3 йиллик режасига мос келади. Миллий тадқиқотларга кўра, 2023 йилда Хитойда катта ёшлиларнинг 57 фоизида ортиқча вазн ёки семизлик кузатилган. Бу кўрсаткич 2018 йилда 51 фоиз, 2013 йилда эса 46 фоиз бўлган эди.
Агар самарали чоралар кўрилмаса, 2030 йилга келиб ортиқча вазн ва семизлик даражаси катталар орасида 65 фоизга етиши, семизлик билан боғлиқ соғлиқни сақлаш харажатлари эса 418 миллиард юанга тенг бўлиши мумкин. Бу Хитойнинг умумий соғлиқни сақлаш харажатларининг 22 фоизини ташкил этади.
Изоҳ (0)