Jahon Savdo Tashkiloti (JST)ning yettinchi bosh direktori Ngozi Okonjo-Iveala 5-iyun kuni O‘zbekistonga tashrif buyurdi. U tashrif chog‘ida mamlakat prezidenti Shavkat Mirziyoyev, prezident yordamchisi Saida Mirziyoyeva hamda boshqa mutasaddilar bilan qator uchrashuvlar o‘tkazdi.
JSTga qo‘shilishning afzalliklari
JSTga aʼzo bo‘lishning ko‘plab afzalliklari bor. Mamlakat qilishi kerak bo‘lgan narsa – bor imkoniyatlardan foydalanish. Tashkilot aʼzolari dunyo savdosining 98 foizini qamrab oladi va siz unga aʼzo bo‘lish orqali boshqalar bilan ishlash imkoniyatiga ega bo‘lasiz. JSTga aʼzolik O‘zbekiston ishlab chiqaruvchilariga jahon bozoriga chiqib, raqobatbardoshlikni oshirish imkoniyatlarini beradi. Tashkilotga aʼzo bo‘lgan mamlakatlar yuqoriroq iqtisodiy o‘sish surʼatlarini ko‘rsatmoqda.
So‘nggi o‘n yilliklarda JSTga qo‘shilgan mamlakatlarda iqtisodiy o‘sish kuzatilmoqda. 2024-yil may oyida Jenevada JST aʼzolarini qiziqtirgan asosiy masalalar bo‘yicha muvaffaqiyatli muzokaralar o‘tkazildi, — deydi direktor Ngozi Okonjo-Iveala.
Ijobiy o‘sish va qiyinchiliklar
Okonjo-Iveala O‘zbekiston rivojlanishiga bergan ijobiy bahosi bilan birga, oldinda turgan qiyinchiliklarga ham to‘xtalib o‘tdi.
Prezident Mirziyoyev 2026-yilga kelib JSTga aʼzo bo‘lishni maqsad qilgan va biz O‘zbekistonga bu yo‘lda yordam beramiz. Hali oldimizda ko‘p ishlar bor va keyingi yillarda prezidentning maqsadiga erishish uchun juda ko‘p mehnat qilishimiz lozim. Mamlakatga JSTga aʼzo bo‘lishlik yo‘lida tirishqoqlik bilan ishlash hamda ko‘proq islohotlar talab etiladi. JSTga aʼzolikni 22 ta davlat kutmoqda. Agar bu tashkilot muvaffaqiyatli bo‘lmaganida, uning aʼzolari soni 166 ga yetar edimi? Nega 22 ta davlat JSTga aʼzo bo‘lish uchun shuncha harakat qilmoqda? Shubhasiz, bu foyda yo‘qotishlardan ko‘pligini ko‘rsatadi, — qayd etdi u.
O‘zbekiston iqtisodiyoti uchun tavsiyalar
JST bosh direktori o‘zbek tadbirkorlari raqobatdan qo‘rqmasligi kerakligini qayd etdi. U, shuningdek, O‘zbekiston iqtisodiyotini yaxshilash uchun tavsiyalari bilan bo‘lishdi.
O‘zbek korxonalari raqobatdan qo‘rqmasligi kerak. Chunki raqobat korxonalarni samaraliroq qiladi. JSTga aʼzolik O‘zbekiston korxonalariga yangi bozorlar va imkoniyatlar ochadi. Tarkibiy infratuzilmani yaxshilash va O‘rta koridor bilan bog‘lanish uchun qilingan investitsiyalar O‘zbekistonni dunyo bilan bog‘langan mamlakatlar qatoriga qo‘shadi. Bu logistikada raqobatbardoshroq bo‘lishga yordam beradi. Ishonamanki, biz bunga erishamiz.
Hozirgidek makroiqtisodiy ramkani juda yaxshi boshqarish muhim. Shuningdek, yangi tarmoqlarni, yangi ish o‘rinlarini yaratish va qiymat zanjirini rivojlantirish uchun afzalliklardan foydalanish zarur. Shu tariqa biz yoshlarimiz uchun bo‘sh ish o‘rinlarini yaratishimiz mumkin, — dedi u.
Taʼkidlash joiz, Shavkat Mirziyoyev 5-iyun kuni Jahon savdo tashkiloti (JST) bosh direktori doktor Ngozi Okonjo-Ivealani qabul qildi. Uchrashuvda O‘zbekistonning JSTga qo‘shilishi borasida ko‘rilayotgan amaliy chora-tadbirlar muhokama qilingan. Shuningdek, “yashil” iqtisodiyotni rivojlantirish, elektron savdo va raqamli xizmatlar eksportini oshirish sohasida hamkorlikni yo‘lga qo‘yish muhimligi taʼkidlangan. Uchrashuv yakunida Ngozi Okonjo-Iveala O‘zbekistonning tashkilotga aʼzo bo‘lish yo‘lidagi saʼy-harakatlarini qo‘llab-quvvatlashini bildirdi.
Izoh (0)