АҚШ президенти Дональд Трумп Исроил халқаро журналистларга қамал остидаги Ғазога кириб, ишлашга рухсат бериши лозимлигини айтди. Бу ҳақда Anadolu хабар берди.
Исроил 2023 йил октябридан бери хорижлик журналистларга Ғазога киришни тақиқлаб қўйган. Фақатгина айрим ҳолларда яҳудий армияси билан чекланган медиа сафарлар ташкил этилмоқда. Ҳозиргача Ғазодаги асосий маълумотлар маҳаллий фаластинлик журналистлар орқали келмоқда. Журналистларни ҳимоя қилиш қўмитасига кўра, уруш бошланганидан бери анклавда камида 184 нафар журналист Исроил ҳужумлари оқибатида ҳалок бўлган. Трумп 14 август куни Оқ уйда журналистларга шундай деб интервью берди:
“Мен бунга рухсат берилишини истайман. Журналистлар учун бу жуда хавфли жой, лекин мен сектордаги воқеаларга гувоҳ бўлишни хоҳлайман”.
Ўтган ҳафта Al Jazeera мухбирлари: Анас ал-Шариф, Муҳаммад Қрайқеа ва яна 3 киши Ғазо шаҳридаги Ал-Шифа шифохонаси яқинида журналистлар чодирига уюштирилган Исроил ҳужуми оқибатида ҳалок бўлгани хабар берилган эди. Шу билан секторда ҳаётдан кўз юмган журналистлар сони, баъзи манбааларга кўра 234 нафарга етган.
2023 йил октябридан бери Исроил Ғазода кенг кўламли ҳарбий амалиёт ўтказиб, 61 мингдан ортиқ фаластинликни (шундан деярли ярми аёллар ва болалар) ўлдирган. Ҳудуд кучли очарчилик ичида қолгмоқда. Халқаро эътирозларга қарамай, Исроил хавфсизлик кенгаши ўтган ҳафта яҳудий Бош вазири Биньямин Нетаньяхунинг режасини маъқуллаб, Ғазо шаҳрида ҳарбий амалиётларни кенгайтириш ва ҳудудни эгаллашга қарор қилган. Ҳозирда анклавдаги аҳоли “мажбуран” кўчирилиш арафасидалиги айтилмоқда.
Изоҳ (0)