Шавкат Мирзиёев 20 ноябрь куни Қонунчилик палатаси мажлисида бош вазир лавозимига Абдулла Арипов номзодини кўрсатди.
Президент ҳукумат ўз фаолиятини мутлақо янгича асосда ташкил этиши керак, бунинг учун унга кучли раҳбар, яъни, бош вазир зарурлигини, бу масалани атрофлича ўйлаб, Ўзбекистон бош вазири лавозимига Абдулла Арипов номзодини кўрсатишга қарор қилганини айтди.
“Абдулла Арипов катта ташкилотчилик салоҳиятига эга бўлган, ижро ҳокимияти тизимида бой билим ва тажриба орттирган, масъулиятни доимо чуқур ҳис этадиган раҳбар”, деди давлат раҳбари.
Ушбу номзод бугун ҳукумат олдига қўйилган, кўлами ва миқёси бениҳоя катта бўлган муҳим вазифаларни ҳал этишда Вазирлар Маҳкамаси фаолиятини самарали ташкил қилиши, ҳукумат аъзолари, вазирлик ва идоралар раҳбарларини бирлаштириб, ягона мақсад сари сафарбар эта олишига ишонч билдирди.
Абдулла Арипов ҳақида
Абдулла Арипов Ўзбекистон ҳукуматига 2016 йилдан буён раҳбарлик қилиб келмоқда.
2016 йил сентябрида у бош вазир ўринбосари лавозимида ишлаган. Ўша йилнинг 13 декабрида Ўзбекистон Либерал-демократик партияси томонидан бош вазирлик лавозимига номзоди кўрсатилган. 14 декабрда ушбу лавозимга тасдиқланган. 2020 йил январида бош вазир лавозимига қайта тасдиқланди.
2024 йил 4 октябрда бош вазир Абдулла Арипов мамлакат шахмат федерацияси раиси этиб сайланди. Мазкур лавозимда 2022 йилнинг май ойидан буён ишлаб келаётган Алишер Саъдуллаев федерация раисининг биринчи ўринбосари бўлди.
Изоҳ (0)