Исроил бош вазири Биньямин Нетаньяху ҲАМАС томонидан Ғазо секторида гаровга олинганларни қайтарган ҳар бир шахсга 5 миллион доллар ваъда қилди. Бу ҳақда Нетаньяху секторга ташрифи чоғида маълум қилди.
Бу вазиятдан қутулишни истаган фаластинликларга мен шундай дейман: кимки бизга гаровга олинган одамни олиб келса, биз унга ва унинг оиласига хавфсиз чиқиб кетиш имкониятини тақдим этамиз. Бундан ташқари, ўғирланган ҳар бир киши учун 5 миллион АҚШ доллари миқдорида мукофот берамиз. Танлов сизники, қарор қилинг. Ҳар қандай ҳолатда ҳам натижа бир хил бўлади: барча гаровга олинганларни қайтариб оламиз, деди бош вазир.
Шунингдек, у Исроил Фаластин анклавидаги ҲАМАСнинг барча тузилмаларини йўқ қилиш ниятида эканини таъкидлади.
Ғазода ҲАМАС энди бўлмайди. Бизнинг ўғирланган одамларимизга зарар етказишга журъат қилган ҳар бир киши ўз боши билан жавоб беради. Биз сизни таъқиб қилиб, албатта етиб оламиз, дея огоҳлантирди Нетаньяху.
ҲАМАС томонидан Исроилдаги шахсларнинг гаровга олиниши
2023 йил 7 октябрда Исроил Ғазо секторидан ракеталар ҳужумига дуч келди. Шундан сўнг, ҲАМАС ҳаракатининг жангчилари чегара ҳудудларига кириб, ҳарбийлар ва фуқароларга ўт очди ҳамда 200 дан ортиқ кишини гаровга олди. Расмий маълумотларга кўра, ўшанда Исроил томонидан 1,2 мингга яқин киши ҳалок бўлган.
Бунга жавобан Исроил Мудофаа кучлари фуқаролик объектларига зарбалар беришни ўз ичига олган “Темир қиличлар” операциясини бошлади ва Ғазо секторини тўлиқ қамал қилганини эълон қилди: сув, электр энергияси, ёнилғи, озиқ-овқат ва дори-дармонлар етказиб бериш тўхтатилди. Исроил ҳужуми оқибатида Ғазо секторида ҳалок бўлганлар сони 43 ,минг кишидан ошди,103 мингдан ортиқ киши жароҳатланди.
Изоҳ (0)