Браун университетининг “Уруш харажатлари” лойиҳаси ҳисоботига кўра, АҚШ йил давомида Исроилга рекорд даражадаги 17,9 миллиард доллар ҳарбий ёрдам кўрсатди.
Ҳисоботда айтилишича, Исроилга ажратилган маблағнинг катта қисми артиллерия снарядларидан тортиб бункерларни йўқ қиладиган ракеталарга сарфланган. Исроилнинг “Темир гумбаз” ва “Довуднинг сопқони” ҳаво мудофаа тизимларини қурол-яроғ ва реактив ёқилғи билан тўлдириш учун 4 миллиард доллардан ортиқ маблағ ажратилган.
Ҳужжатга кўра, Вашингтон минтақада ҳарбий амалиётларни йўлга қўйиш учун қўшимча 4,86 миллиард доллар берган. Бу маблағ ичида Яман ҳусийларининг кемаларга ҳужумларини бостириш кампаниясига ажратилган пуллар ҳам бор, дея аниқлик киритмоқда AP.
Ҳисоботда айтилишича, Исроил АҚШдан энг кўп ҳарбий ёрдам олган давлатга айланди. 1959 йилдан бери Исроил Америкадан тахминан 251,2 млрд доллар миқдорида ёрдам олган (инфляцияни ҳисобга олган ҳолда). Исроилга йил давомида ажратилган маблағ АҚШнинг бир йил ичидаги энг йирик ҳарбий ёрдамига айланди.
2023 йилнинг 7 октябрь куни ҲАМАС жангчилари Ғазо сектори билан чегарадош Киббуц Реим шаҳридаги мусиқа фестивалига ташриф буюрувчиларга ҳужум уюштирганди. Улар 253 нафар исроилликни асирга олиб, анклавга олиб кетган.
- Исроил расмийларига кўра, 1,2 мингга яқин одам ҳужум қурбони бўлган. Бунга жавобан Исроил Ғазо секторида ҳарбий операция бошлади. Фаластин Соғлиқни сақлаш вазирлиги маълумотларига кўра, Ғазода можаро бошланганидан бери бир йил ичида 42 мингга яқин одам ҳалок бўлган.
- Сўнгги ой ичида минтақада — Исроил ва Ливан чегарасида кескинликнинг янги босқичи бошланди.
Изоҳ (0)