Франция президенти Эммануэль Макрон ва Германия канцлери Олаф Шольц Исроилни Рафаҳдаги операцияни тўхтатишга чақирди. Бу ҳақда Bild хабар берди.
Макрон Рафаҳдаги вазиятни “даҳшатли” деб атади, 27 майга ўтар кечаси Исроил армияси Рафаҳдаги фаластинлик қочқинлар лагерига берган зарбаси оқибатида 45 киши ҳалок бўлганди.
“Франция ҲАМАСнинг Исроилга ҳужумини бошидан қоралаган ва Исроилнинг ўзини ҳимоя қилиш ҳуқуқини қўллаб-қувватлади, лекин ҳар қандай демократия каби — халқаро қонунларга мувофиқ”, — деди Франция президенти.
Германия канцлери эса “Исроил ўз ҳаракатларида халқаро ҳуқуқни ҳурмат қилиши кераклигини таъкидлади. У қочқинлар лагерининг ўққа тутилиши оқибатида кўплаб одамлар ўлганини “фожиали воқеа” деб атади.
“Бу ҳолат яна бир бор нега Германия бошқа кўплаб давлатлар сингари Рафаҳдаги кенг кўламли қуруқликдаги ҳужумга қаршилик кўрсатганини билдиради. Чунки у ерда тинч аҳоли етарлича ҳимояланмаган”, — деди Шольц.
“Одамлар тириклайин ёнган”: Исроилнинг Рафаҳдаги қочқинлар лагерига ҳужуми
- 27 майга ўтар кечаси Исроил армияси “аниқ разведка маълумотлари асосида” Рафаҳга ҳужум қилганини эълон қилди. Зарбада ҲАМАС ҳарбий қанотининг икки вакили Ясин Рабиа ва Холид Нагар ҳалок бўлди. Бироқ қочқинлар лагерига берилган зарба оқибатида 45 киши ҳалок бўлди, уларнинг кўпи аёллар ва болалардир.
Қурбонларнинг аксарияти танаси бутунлай ёниб кетган, Исроил аввалроқ мазкур лагерга кўчирилганлар хавфсиз ҳудудда эканини айтганди. Исроил бош вазири Биньямин Нетаньяху ушбу баёнотни текширишга ваъда берди. БМТ Исроил армиясининг ҳаракатларини қоралади.
- 24 май куни Халқаро суд Исроилга Ғазо сектори Рафаҳ шаҳридаги ҳарбий амалиётини ва Фаластин аҳолисининг йўқ қилинишига олиб келиши мумкин бўлган бошқа ҳаракатларни тўхтатишни буюрди.
Бир ой ичида Исроил ҳукумати буйруқнинг бажарилиши ҳақида ҳисобот бериши керак. Исроил Ташқи ишлар вазирлиги ва Хавфсизлик кенгаши баёнотида улар операцияни тўхтатиш ниятида эмасликларини таъкидлади.
Изоҳ (0)