Исроил ҳукумати Ғазо сектори жанубига ҳужум қилиш режаларини тасдиқлади. Бу ҳақда бош вазир Биньямин Нетаньяху маълум қилди.
Нетаньяхунинг сўзларига кўра, Исроил сектор жанубидан аҳолини эвакуация қилишга тайёрланмоқда. У Рафаҳдаги ҲАМАСнинг йўқ қилиниши “ғалаба учун муҳим” экани, акс ҳолда Исроил “экзистенциал таҳдид”га дуч келишини айтди.
Бу кўп вақт талаб қилмайди. Бизни ҳеч нарса тўхтата олмайди: на рамазон, на АҚШ босими, на бошқа босим, — деди Нетаньяху.
У ҳужум операцияси қачон бошланиши мумкинлигини айтмади.
Март ойи бошида АҚШ президенти Жо Байден Исроилни Рафаҳдаги ҳужум операциясидан огоҳлантирганди. У ҳужум Нетаньяху учун “қизил чизиқ” бўлишини таъкидлаганди. Шунга қарамай, 15 март куни Нетаньяху Рафаҳ шаҳрида операция режасини тасдиқлади.
22 март куни Исроилнинг стратегик масалалар бўйича вазири Рон Дермер Вашингтон билан муносабатларга путур етказган тақдирда ҳам Исроил Рафаҳга бостириб киришини айтди. 29 март куни Тhе Washington Post газетаси манбаларга таяниб, Рафаҳ шаҳридаги қуруқликдаги операциядан хавотирга қарамай, АҚШ Исроилга миллиард долларлик бомба ва қирувчи самолётлар берилишини маъқуллагани ҳақида хабар берди.
Изоҳ (0)