Исроил бош вазири Биньямин Нетаньяху ҳукуматга Исроил қамоқхоналарида янги маҳбуслар ва ҳибсга олинганлар учун минглаб жой тайёрлашни топширди. Бу ҳақда The Times of Israel хабар берди.
Нетаньяху тегишли кўрсатмаларни Исроил армияси (“Сахал”) ва хавфсизлик хизмати (“Шабак”) билан учрашувда берган. Вазирликлараро йиғилишда расмийлар бир йил давомида Ғазо сектори ва Ғарбий Соҳилда минглаб гумонланувчилар ва жангчилар ҳибсга олинади, деган хулосага келган. Бунга олдиндан тайёрланмаса, Исроил қамоқхоналарида жой танқислиги юзага келади.
Исроил ҲАМАС ҳаракати билан уруш бошлаганидан бери 4 мингга яқин кишини террорчиликда айблаб, ҳибсга олган. Уларнинг аксарияти Ғазо секторидандир.
Исроил ва ҲАМАС ўртасидаги уруш 2023 йил 7 октябрь куни эрталаб Исроил ҳудудларига ҳужум билан бошланган. Оқибатда 1,2 минг исроиллик ҳалок бўлди, 5,4 минг киши яраланди, 200 дан ортиқ маҳаллий аҳоли ва чет элликлар гаровга олинди. Уларнинг айримлари икки томонлама сулҳ доирасида озод этилди.
Исроилнинг Ғазо секторига ҳужумлари оқибатида 30 мингдан ортиқ фаластинлик ҳалок бўлди, 71 мингга яқин одам жароҳатланди.
Изоҳ (0)