Европа Иттифоқи ташқи ишлар вазирлари Исроил Халқаро суднинг Рафаҳдаги операцияни тугатиш ҳақидаги буйруғини бажаришдан бош тортса, унга қарши санкциялар қўллаш бўйича “жиддий музокаралар” ўтказди. Бу ҳақда Ирландия ташқи ишлар вазири Майкл Мартинга таяниб, Politico хабар берди.
Мартиннинг сўзларига кўра, Евроиттифоқ давлатлари доим суд қарорларини бажариш зарурлигини таъкидлаб келган.
“Халқаро Суднинг вақтинчалик қарори бўйича қизғин мунозаралар бўлиб ўтди. Бунда Исроил чегара пунктини очиш ва Рафаҳдаги ҳарбий амалиётларини тўхтатиш борасидаги буйруққа амал қилиши кераклиги тўғрисида жуда аниқ позиция акс этди.
Халқаро гуманитар ҳуқуқ, инсон ҳуқуқларини ҳурмат қилиш Европа Иттифоқининг асосидир ва ҳозирги вазият бу масалани ҳақиқатан ҳам диққат марказига қўймоқда, айниқса, кеча тунда содир бўлган ҳужумда жуда кўплаб бегуноҳ одамлар ўлдирилган”, — деди Мартин.
Исроилнинг ташқи матбуот алоқалари департаменти Мартиннинг баёнотларига изоҳ бермаслигини билдирди.
“Армия Бош штаби ҳодиса сабабларини ўрганмоқда ва ҳарбийлар тинч аҳолига ҳар қандай зарар етказганидан афсусда”, —дейилади Исроил томони баёнотида.
Европа Иттифоқи 27 май куни Исроил кучларининг Рафаҳга уюштирган зарбаси фонида Европа Иттифоқи— Исроил ассоциация кенгашини чақирди.
Бельгия ташқи ишлар вазири Ажа Лабиб кенгашни чақириш қарори Европа дипломатияси раҳбари Жосеп Боррель билан биргаликда қабул қилинганини айтди. Евроиттифоқ Исроилнинг инсон ҳуқуқлари бўйича мажбуриятларига риоя қиляптими ёки йўқлигини баҳолашни режалаштирмоқда. Боррелнинг айтишича, Европа Иттифоқи ташқи ишлар вазирлари Исроил билан ҳамкорлик шартномасини қисман тўхтатиб қўйишга рухсат берган.
“Одамлар тириклайин ёнган”: Исроилнинг Рафаҳдаги қочқинлар лагерига ҳужуми
- 27 майга ўтар кечаси Исроил армияси “аниқ разведка маълумотлари асосида” Рафаҳга ҳужум қилганини эълон қилди. Зарбада ҲАМАС ҳарбий қанотининг икки вакили Ясин Рабиа ва Холид Нагар ҳалок бўлди.
Бироқ қочқинлар лагерига берилган ҳужум оқибатида 45 киши ҳалок бўлди, уларнинг кўпи аёллар ва болалардир. Қурбонларнинг аксарияти танаси бутунлай ёниб кетган, Исроил аввалроқ мазкур лагерга кўчирилганлар хавфсиз ҳудудда эканини айтганди. Исроил бош вазири Биньямин Нетаньяху ушбу баёнотни текширишга ваъда берди. БМТ Исроил армиясининг ҳаракатларини қоралади.
- 24 май куни Халқаро суд Исроилга Ғазо сектори Рафаҳ шаҳридаги ҳарбий амалиётини ва Фаластин аҳолисининг йўқ қилинишига олиб келиши мумкин бўлган бошқа ҳаракатларни тўхтатишни буюрди.
Бир ой ичида Исроил ҳукумати буйруқнинг бажарилиши ҳақида ҳисобот бериши керак. Исроил Ташқи ишлар вазирлиги ва Хавфсизлик кенгаши баёнотида улар операцияни тўхтатиш ниятида эмасликларини таъкидлади.
Изоҳ (0)