Нетаньяху: Рафаҳдаги шиддатли жанглар фазаси тез орада якунланади

Исроил бош вазири Биньямин Нетаньяху Рафаҳда ҲАМАСга қарши шиддатли жанглар фазаси тез орада пасайишини айтди. Бу ҳақда Haaretz хабар берди.

Нетаньяхунинг сўзларига кўра, ҲАМАСга қарши уруш у йўқ қилинмагунча давом этади.

Рафаҳдаги жанговар ҳаракатларнинг жадал босқичи тез орада тугайди, аммо операциялар ва зарбаларни давом эттирамиз ва таслим бўлмаймиз. Уларга бор кучимиз билан зарба берамиз, — деди у.

Исроил бош вазири Ғазо секторидаги жангларнинг интенсив босқичи ҳам тез орада якунланиши билдирди. Бу кучларнинг бир қисмини “мудофаа мақсадида” шимолга ўтказиш ва эвакуация қилинганларни уйларига қайтариш имконини беради. Нетаньяху шимолдаги вазиятни ҳал қилиш бўйича келишув фақат Исроил шартларига кўра амалга ошишини таъкидлади.

У ҲАМАС билан қисман келишувга тайёрлигини яна бир бор айтди. Аммо Исроил келишувдан кейин ҳарбий ҳаракатларни қайта тикламоқчи.

Нетаньяхунинг таъкидлашича, Ғазо секторида фақат Исроил армияси “терроризмни йўқ қилиши” мумкин, шундан сўнг анклавда маҳаллий фаластинликлар иштирокида фуқаролик бошқаруви тузилиши керак.

Ҳарбий назорат Исроилда қолади, Ғазо сектори демилитаризация қилинади ва анклавда минтақадаги мўтадил мамлакатлар назорати остидаги ҳукумат тузилиши керак,  — дейди Исроил бош вазири.