Исроил бош вазири Бенямин Нетаньяху Ғазо секторининг Рафаҳ шаҳридаги қочқинлар лагерига уюштирилган ҳужумни “фожиали хато” деб атади. Мазкур ҳужум оқибатида 45 киши, жумладан, аёллар ва болалар ҳалок бўлди. Бу ҳақда BBC хабар берди.
“Бегуноҳ фуқароларга зарар етказмаслик учун барча саъй-ҳаракатларимизга қарамай, кеча тунда фожиали хатолик юз берди. Биз бу воқеани текшириб, хулоса чиқарамиз, чунки сиёсатимиз шундай”, — деди Нетаньяху Исроил парламентидаги чиқишида.
У “барча мақсадларга эришилмагунча” урушни тугатиш ниятида эмаслигини билдирди. Исроилнинг зарбаси халқаро, жумладан, гуманитар ташкилотлар, БМТ ва Европа Иттифоқи томонидан қораланди. Европа Иттифоқи дипломатияси раҳбари Жосеп Боррель Исроилни БМТ судининг Рафаҳга ҳужумни тўхтатиш буйруғига амал қилишга чақирди.
“Бу операциялар тўхтатилиши керак. Рафаҳда фаластинлик тинч аҳоли учун хавфсиз ҳудудлар йўқ. Мен халқаро ҳуқуқни тўлиқ ҳурмат қилишга ва зудлик билан ўт очишни тўхтатишга чақираман”, — деди Франция президенти Эммануэль Макрон.
Исроилнинг ҲАМАС билан музокараларида воситачилик қилаётган Қатар Ташқи ишлар вазирлиги бу воқеа музокараларни қайта тиклаш ва гаровга олинганларни озод қилишга тўсқинлик қилиши мумкинлигидан огоҳлантирди.
“Одамлар тириклайин ёнган”: Исроилнинг Рафаҳдаги қочқинлар лагерига ҳужуми
- 27 майга ўтар кечаси Исроил армияси “аниқ разведка маълумотлари асосида” Рафаҳга ҳужум қилганини эълон қилди. Зарбада ҲАМАС ҳарбий қанотининг икки вакили Ясин Рабиа ва Холид Нагар ҳалок бўлди.
Бироқ қочқинлар лагерига берилган ҳужум оқибатида 45 киши ҳалок бўлди, уларнинг кўпи аёллар ва болалардир.
Қурбонларнинг аксарияти танаси бутунлай ёниб кетган, Исроил аввалроқ мазкур лагерга кўчирилганлар хавфсиз ҳудудда эканини айтганди. Исроил бош вазири Биньямин Нетаньяху ушбу баёнотни текширишга ваъда берди. БМТ Исроил армиясининг ҳаракатларини қоралади.
- 24 май куни Халқаро суд Исроилга Ғазо сектори Рафаҳ шаҳридаги ҳарбий амалиётини ва Фаластин аҳолисининг йўқ қилинишига олиб келиши мумкин бўлган бошқа ҳаракатларни тўхтатишни буюрди.
Бир ой ичида Исроил ҳукумати буйруқнинг бажарилиши ҳақида ҳисобот бериши керак. Исроил Ташқи ишлар вазирлиги ва Хавфсизлик кенгаши баёнотида улар операцияни тўхтатиш ниятида эмасликларини таъкидлади.
Изоҳ (0)