Исроил бош вазири Биньямин Нетаньяху фавқулодда ҳарбий кабинетни тарқатиб юборди. У тегишли қарорни Исроил мухолифати етакчиларидан бири Бенни Ганц ҳукуматдан истеъфога чиққанидан сўнг қабул қилган. Бу ҳақда Ynet хабар берди.
Нетаньяху ўз қарорини 16 июнь куни хавфсизлик масалаларига бағишланган Вазирлар маҳкамаси йиғилишида маълум қилган. Ганц истеъфога чиқишидан олдин ҳам ҳарбий Вазирлар маҳкамаси тарқатиб юборилиши, унинг ўрнига Нетаньяху вазирлар билан тор доирада учрашувлар ўтказишда давом этиши кутилганди.
Исроил собиқ мудофаа вазири ва бош вазир ўринбосари Бенни Ганц 2023 йил 7 октябрда ҲАМАСнинг Исроилга ҳужумидан сўнг дарҳол бош вазир Биньямин Нетаньяхунинг ҳарбий кабинетига кирди. Бироқ ўтган ҳафта у Вазирлар маҳкамасидан кетишини эълон қилди ва мамлакатда муддатидан олдин сайловлар ўтказишга чақирди. Яқинда у Нетаньяхуни очиқчасига танқид қилиб, уни Ғазо сектори учун урушдан кейинги стратегияни тақдим эта олмаганликда айблади.
Май ойи ўрталарида Бенни Ганц Исроил бош вазирига ультиматум қўйиб, агар у 8 июнгача Ғазо секторида урушдан кейинги вазиятни тартибга солиш режасини тақдим қилмаса, истеъфога чиқишини айтганди. Ганцнинг фикрича, режа олтита стратегик мақсадни ўз ичига олиши керак, жумладан, гаровга олинганларни озод қилиш, ҲАМАСни ағдариш, Ғазо секторини демилитаризация қилиш ва уни назорат қилиш, АҚШ, Европа Иттифоқи, араб давлатлари ва фаластинликлар иштирокида анклавнинг “фуқаролик бошқарувининг халқаро механизми”ни яратиш.
Изоҳ (0)