НАТО бош котиби Йенс Столтенбергнинг фикрича, Россия ядровий доктринасига киритилган ўзгартиришлар Ғарбнинг Украинага ёрдам кўрсатишини олдини олишга уринишдир.
Унинг сўзларига кўра, ҳар сафар Ғарб давлатлари Украинани қўллаб-қувватлашни кучайтирганда, “руслар халақит қилишга уринган”. Бироқ Столтенберг Россия ядровий доктринасидаги ўзгаришлар ҳозирча альянс томонидан ҳеч қандай чора кўришни талаб қилмаслигини қайд этиб ўтди.
“Ҳар сафар биз янги турдаги қуроллар — жанговар танклар, узоқ масофага учувчи самолётлар ёки F-16 қирувчи самолётлари билан қўллаб-қувватловни оширганимизда, руслар бизни тўхтатишга ҳаракат қилади. Улар муваффақиятга эриша олмади ва бу сўнгги мисол НАТО иттифоқчиларининг Украинани қўллаб-қувватлашига тўсқинлик қилмаслиги керак”, деди Столтенберг Брюсселдаги НАТО қароргоҳида қилган чиқишида.
Йенс Столтенберг аввалроқ Россиянинг ядровий доктринасига киритилган ўзгартиришлар НАТО аъзоларини “қўрқитиш”га қаратилганини айтганди. У Владимир Путиннинг ушбу мавзуга бағишланган нутқини “хавфли ва масъулиятсиз риторика” деб атади.
Ўтган ҳафта Хавфсизлик Кенгаши йиғилишида Владимир Путин ядровий доктринага ўзгаришларни эълон қилди. Ҳужжатга кўра, ядро қуролидан фойдаланишга дронлар, ракеталар ёки ҳарбий самолётларнинг оммавий равишда учирилиши ҳақидаги маълумотлар асос бўлиши мумкин.
Янгиланган доктринада, шунингдек, ядровий давлат кўмагида ядро қуролига эга бўлмаган давлат томонидан Россияга қарши тажовуз қўшма ҳужум сифатида қаралиши айтилади. Кейинроқ, 29 сентябрь куни Кремль ядровий доктринага тузатишлар аллақачон тайёрланган ва тез орада расмийлаштирилади, деб аниқлик киритди.
Изоҳ (0)