Дания Украина билан 10 йил муддатга хавфсизлик шартномаси тузди, шунингдек, Украинага шу ёзда F-16 қирувчи самолётларини етказиб беришни назарда тутувчи янги ҳарбий ёрдам пакетини эълон қилди.
Ғарб ОАВлари Дания ТИВ баёнотига таяниб хабар қилишича, “келишув келгуси 10 йил ичида ҳарбий ва фуқаролик ёрдами амалга оширилишини билдиради”.
Шу билан бирга, Дания Украинага 1,7 миллиард крон (тахминан 228 миллион евро) миқдорида янги ҳарбий ёрдам пакетини эълон қилди. Украинага 15-ёрдам пакети 15 минг артиллерия снарядлари, шунингдек, дрон ва ҳаво ҳужумидан мудофаа тизимларини етказиб беришни ўз ичига олади, деди Дания Мудофаа вазирлиги раҳбари Троелс Лунд Поулсен.
Бундан ташқари, у ёзда Дания Украинага F-16 қирувчи самолётларини етказиб беришини айтди.
Аввалроқ Дания бош вазири Метте Фредериксен иттифоқчиларни Украинага ёрдам ҳажмини оширишга чақирганди.
“Биз кўпроқ давлатлар буни олти ой ёки бир йил ичида эмас, балки ҳозир — эҳтиёж жуда ва жуда катта бўлганда амалга оширади деган умиддамиз”, — деди у матбуот анжуманида.
Изоҳ (0)