Бельгия F-16 га техник хизмат кўрсатиш учун Украинага 100 млн евро ажратади

Бельгия Вазирлар кенгаши жума куни Украинага F-16 жанговар самолётларига техник хизмат кўрсатиш учун 100 миллион евро миқдорида ҳарбий ёрдам кўрсатишни маъқуллади, деди Бельгия мудофаа вазири Лудивин Дедондер.

Бельгия Нидерландия, Дания ва Қўшма Штатлар бошчилигидаги F-16 коалициясининг 13 та аъзо давлатларидан бири бўлиб, у Киевга ушбу кўп мақсадли қирувчи самолётларни етказиб беришни режалаштирмоқда.

“Бельгия ушбу коалиция ташкил этилганидан бери иштирок этиб келади”, — деди Дедондер ўз чиқишида.

“Биз аллақачон F-16 флотига оператив хизмат кўрсатиш бўйича украиналик техник мутахассисларни тайёрлашни бошладик. Ушбу илғор ва юқори технологияли самолётнинг бўлажак учувчиларини ўқитиш ва тайёрлашда иштирок этиш Данияда бўлиб ўтади”, — деди вазир.

Бельгия оммавий ахборот воситалари эсга олишларича, 2023 йил октябрь ойида Украина президенти Владимир Зеленскийнинг Брюсселга ташрифи муносабати билан Бельгиянинг амалдаги ҳукумати F-16 самолётларини 2025 йилда Украинага топшириш ниятида эканлигини маълум қилганди.

Бироқ бундай қарор парламент сайловларидан кейин ҳокимият тепасига келадиган бўлажак ҳукумат томонидан тасдиқланиши керак.