Украиналик учувчиларнинг биринчи гуруҳи F-16 қирувчиларини бошқариш бўйича Буюк Британияда ўқишни якунлади

Украиналик учувчиларнинг биринчи гуруҳи Буюк Британиядаги асосий тайёргарлик дастурини якунлади ва Данияда F-16 қирувчи самолётлари билан ишлашни бошлади, деб хабар бермоқда Британия ҳукумати.

Август ойида бошланган тренинг инглиз тилида учувчилик ва авиация терминологияси бўйича махсус тайёргарликдан иборат бўлди. Олти нафар тажрибали украиналик учувчи ўқишни тамомлади, яна ўн нафар стажор Британияда асосий парвоз машғулотлари, авиатиббий тайёргарлик ва центрифуга машғулотлари учун қолди.

“Келажакда Украина юқори самарали тўртинчи авлод F-16 қирувчи самолётлари асосида ташкил этилган замонавий ҳаво кучларига эга бўлади. Бу қадам жаҳондаги етакчи ҳаво кучларининг тайёрлови билан биргаликда Украинанинг совет давридан қолган ҳозирги имкониятларини сезиларли даражада оширди”, — деди Британия Мудофаа вазири Грант Шаппс.

Ёзда Нидерландия Киевга 42 та, Дания эса 19 та F-16 қирувчи самолётини ваъда қилган. Бундан ташқари, Киев Бельгиядан бир нечта қирувчи самолётларни олади. Декабрь ойининг ўрталарида Нидерландия Украинага жўнатиш учун дастлабки 18 та учоқ тайёрлашни бошлади.