Нидерландия Украинага F-16 самолётлари ёрдамида Россиядаги ҳарбий нишонларга ҳужум қилишга рухсат берди

Нидерландия мудофаа вазири Рубен Брекелманс мамлакат расмийлари Украинага берилган қуроллардан фойдаланиш доирасини чекламаганини маълум қилди.

Унинг аниқлик киритишича, Украина Қуролли кучлари Нидерландиядан олинган F-16 қирувчи самолётлари ёрдамида Россия ҳудудидаги ҳарбий нишонларга ҳужум қилиши ва унинг ракеталарини уриб тушириши мумкин.

“Украинага халқаро ҳуқуқ меъёрларига кўра ўзини ҳимоя қилиш учун Россия ҳудудида қуролларимиздан фойдаланишга рухсат берилган... Агар мамлакат чегара ҳудудлари ёки Россия аэродромларидан ҳужумга учраса, у ҳарбий нишонларга ҳужум қилиши мумкин. Худди шу нарса душман ракеталарига ҳам тааллуқлидир – уларни бизнинг қуролларимиз Россия узра тутиб олиши ҳам мумкин”, дея тушунтирди вазир Франкфуртер Аллгемеине Зеитунг нашрига берган интервьюсида.

Брекелманснинг сўзларига кўра, “халқаро ҳуқуқ масофа билан чекланмайди” ва “ўзини ҳимоя қилиш ҳуқуқи чегарадан 100 км узоқликда тугамайди”. У Украина Қуролли Кучлари жангчилари қирувчи самолётлардан “халқаро қонунларга мувофиқ” фойдаланишига ишонч билдирди.

“Биз ўз позициямизни тушунтирган ҳолда, бошқаларни ҳам Украинага берилган қуроллардан фойдаланиш бўйича чекловларни бекор қилишга чақирамиз. Чекловларни бутунлай олиб ташлашни истамасалар, ҳеч бўлмаганда Россия ҳарбий аэродромлари ёки қирувчи самолётлари учун истисно қилишлари керак”, дея қўшимча қилди Рубен Брекелманс.

Июль охирида, Bloomberg маълумотларига кўра, Украина биринчи F-16 қирувчиларини олди. Тhе Тimes нашрининг ёзишича, Нидерландия олтита F-16 етказиб берган, Дания эса яна бир нечтасини етказиб бериши керак эди.

Нидерландия Мудофаа вазирининг маълум қилишича, F-16 дан фойдаланган ҳолда Россия Федерацияси ҳудудида фуқаролик нишонларига ҳужум қилиш тақиқланади.