Халқаро футбол федерацияси клублар ўртасидаги Жаҳон чемпионатининг янги кубогини намойиш қилди.
Ушбу соврин 2025 йилги турнир ғолибига топширилади. Мукофот Американинг ҳашаматли заргарлик уйи Tiffany & Cо билан ҳамкорликда ишлаб чиқилган.
Мазкур мусобақанинг гуруҳ босқичига қуръа ташлаш маросими 5 декабрь куни Майамида бўлиб ўтади.
2025 йилдан бошлаб клублар ўртасидаги Жаҳон чемпионатида 32 та жамоа иштирок этади. Европадан 12 та жамоа, Жанубий Америкадан 6 та, Африка, Осиё ва КОНКАКАФдан 4 тадан ва Океаниядан битта жамоа иштирок этади. Турнирнинг илк мезбони Америка Қўшма Штатлари бўлади.
FIFA президенти Жанни Инфантино бу борада ўз фикрларини билдириб ўтган эди:
“Клублар ўртасидаги Жаҳон чемпионати профессионал клублар футболининг энг юқори чўққиси бўлади. АҚШ турнирнинг янги форматини ўтказиш учун идеал жой”.
Эслатиб ўтамиз, 2023 йилги клублар ўртасидаги Жаҳон чемпионати йил охирида Саудия Арабистонида бўлиб ўтган ва унда “Манчестер Сити” ғолиб бўлган эди.
Изоҳ (0)