Футбол бўйича 2026 йилги Жаҳон чемпионати саралаш ўйини якунланди, унда Парагвай терма жамоаси Аргентинани қабул қилди. Асунсон шаҳридаги Defensores del Chako стадионида бўлиб ўтган учрашув мезбонларнинг 2:1 ҳисобидаги ғалабаси билан якунланди.
Парагвай терма жамоасининг голларига Арналдо Антонио Санабриа ҳамда Омар Алдерете муаллифлик қилди.
Аргентина терма жамоасининг ягона голига Лаутаро Мартинес муаллифлик қилди.“Интер Майами” ҳужумчиси Лионель Месси майдонга асосий таркибда тушди ва ҳеч қандай самарали ҳаракатларни амалга ошира олмади.
Маълумот учун, Аргентина терма жамоаси 22 очко билан гуруҳда якка пешқадамлик қилмоқда. Парагвай эса ушбу ғалабадан сўнг 16 очко билан бешинчи ўринда бормоқда.
Кейинги учрашувда Аргентина терма жамоаси Перуга, Парагвай эса Боливияга қарши баҳс олиб боради.
Венесуэлага сафар уюштирган Бразилия жамоаси дуранг қайд этди.
43-дақиқада “пентакампеонлар” ярим ҳимоячиси Рафинья ҳисобни очди. Танаффусдан сўнг дарҳол захирадан майдонга тушган венесуэлалик ярим ҳимоячи Теласко Сеговия жавоб голини киритди. 62-дақиқада “Реал” ҳужумчиси Винисиус Жуниор Бразилияга ғалаба келтириши мумкин эди, бироқ у тепган пенальтини мезбонлар дарвозабони Рафаэл Ромо қайтара олди. 89-дақиқада Венесуэла терма жамоаси ҳимоячиси Александр Гонсалес майдондан четлатилди ва ўйин дуранг билан якунланди.
Бразилия терма жамоаси 11 ўйиндан 17 очко тўплаган ҳолда 2026 йилги Жаҳон чемпионатига саралаш турнирида учинчи ўринни эгаллаб турибди. Венесуэла 11 ўйиндан 12 очко жамғариб, еттинчи ўринга кўтарилиб олди, бу эса қитъалараро плей-оффда ўйнаш ҳуқуқини беради.
Изоҳ (0)