11 йил аввал Равшан Эрматов ЖЧ—2010 мусобақаси очилиш беллашувини бошқарганди. У ҳозиргача мундиаллар тарихида энг кўп ўйин ўтказган ҳакам бўлиб турибди

Бундан роппа-роса 11 йил аввал, 2010 йил 11 июнь куни Жанубий Африка Республикасида футбол бўйича Жаҳон Чемпионати старт олганди.

ЖАР ва Мексика терма жамоалари ўртасидаги учрашув ўзбекистонлик ҳакам Равшан Эрматов ҳуштагидан кейин бошланганди. Бу ўзбекистонлик ФИФА ҳаками учун мундиаллардаги дебют ўйин эди. Ўшанда 32 ёшли Эрматов Жаҳон Чемпионати ўйинини бошқарга энг ёш ҳакамга айланганди.

2008 йил клублар ўртасидаги Жаҳон чемпионатида муваффақиятли ишлаган Эрматов орадан икки йил ўтиб, ЖЧ—2010 га чақирув олади. Японияда ўтган клублар ўртасидаги мундиалда Эрматов чорак финал доирасидаги «Ал-Аҳли» (Миср) — «Пачука» (Мексика) ва финалдан ўрин олган «Кито» (Эквадор) — «Манчестер Юнайтед» (Англия) учрашувларини бошқариб боради. Манкунианлар ҳимоячиси Неманя Видичга кўрсатилган қизил карточка билан ёдда қолган финалда инглиз жамоаси минимал ҳисобда ғалаба қозонганди.

ЖЧ—2010 очилиш ўйини шубҳасиз Эрматов фаолиятидаги энг муҳимларидан бири ҳисобланади. Ўйин хато ва камчиликларсиз бошқарилганидан ташқари, 37-дақиқадаги ҳолат ҳам кўпчиликнинг эътиборини тортгани аниқ: ЖАР жарима майдони атрофидаги стандарт вазият вақтида мексикаликлар қанотдан узатилган тўпдан кейин ҳисобни очади. Унда дарвозабон гол урган ҳужумчидан олдинга ўтиб кетган ва бир қарашда офсайд йўқдек эди. Бироқ қанот ҳаками Рафаэл Илёсов байроқни кўтариб, ўйиндан ташқари ҳолат қайд этилганини кўрсатади. Бир лаҳза мексикалик футболчилар қатори кўпчилик ҳакамлар хатога йўл қўйганини эътироф этади. Аммо бу вазиятда ўзбекистонлик ҳакамлар гуруҳи тўғри қарор чиқарганди: гол вақтида африкаликларнинг бир футболчиси гол урган ўйинчига нисбатан дарвозага яқин турганди. Футболда кам учрайдиган бундай вазиятда тезкор чиқарилгани оқилона қарор Эрматов гуруҳининг обрўйини ошириб юборади.

Кейинчалик Эрматов ЖАРдаги мусобақада яна тўртта ўйинга тайинланди: Англия — Жазоир, Греция — Аргентина (иккиси гуруҳ босқичи), Аргентина — Германия (1/4 финал) ва Уругвай — Нидерландия (1/2 финал). Бу орқали у битта мундиалнинг 5 та ўйинида ишлаган тарихдаги уч ҳакамнинг бирига айланади.

Бразилияда ўтган ЖЧ—2014 да Эрматов тўртта ўйинда ишлади: гуруҳ босқичида Швейцария — Эквадор, Хорватия — Мексика, АҚШ — Германия, чорак финалда Нидерландия — Коста-Рика.

ЖЧ—2018 да эса ўзбекистонлик ҳакам гуруҳ босқичида иккита ўйинни бошқарди: Аргентина — Хорватия, Испания — Марокаш.

Эрматов Жаҳон Чемпионатларида 11 та ўйинда иштирок этган ва бу борада мутлақ рекордчи ҳисобланади. Унинг яқин таъқибчиси Нестор Питана ҳисобида 9 та ўйин бор.

Равшан Эрматов 2019 йилда ҳакамлик фаолиятини якунлаган ва ЎФА биринчи вице-президенти этиб сайланганди.

Эрматов ҳозирда Миллий Олимпия қўмитаси раиси ўринбосари ва ЎФА вице-президенти лавозимларида ишлаб келмоқда. Эрматов айни вақтда Саудия Арабистонида марказлашган тизимда ўтаётган ЖЧ—2022 саралаш баҳсларида иштирок этаётган Ўзбекистон миллий терма жамоаси делегацияси билан бўлиб турибди.