Бруней футбол ассоциациясининг маълум қилишича, Россия терма жамоаси билан ўтказиладиган ўртоқлик ўйинига биринчи жамоа юборилмайди.
“Россияга иккинчи жамоани юборамиз. Асосий таркибдаги кўпчилик футболчилар кела олмайди. Улар таътилда бўлади. Уларда бунинг учун бор-йўғи битта муддат бор — ноябрда уч ҳафта, чунки мавсумолди тайёргарлик декабрда бошланади. Иккинчи жамоадаги ўйинчиларнинг аксарияти Бруней Қироллик қуролли кучларига қарашли “MS ABDB” жамоасидан, аммо армия шунчаки ном, улар хизмат қилмайди.
Футболчиларнинг деярли барчаси профессионал эмас. Яъни уларнинг асосий иши бор, кейин эса соат 16:30 дан бошлаб ўз клублари таркибида машғулотларга киришади. Айни дамда Россияга йўл олиш учун футболчилар сараланмоқда. Футболчиларининг номларини юборишнинг охирги муддати — шанба куни”, дейилади хабарда.
Октябрь ойидаги FIFA танаффусида Россия терма жамоаси Покистон термаси билан ўйнаши керак эди, бироқ рақиб ўртоқлик учрашувидан бош тортди. Натижада Валерий Карпин шогирдлари йиғинни ўйинсиз ўтказди.
Маълумот учун, 2022 йилнинг февраль ойидан бошлаб FIFA ва УЕФА қарори билан Украинадаги вазият туфайли Россиянинг барча терма жамоалари ва клублари халқаро турнирлардан четлаштирилди. Шу тариқа Россия эркаклар терма жамоаси Қатардаги жаҳон чемпионати ва Германияда бўлиб ўтган Европа чемпионатини ўтказиб юборди.
Изоҳ (0)