Еттинчи «Олтин тўп»ини қўлга киритган Месси, Англияда энг яхши ўйинчи деб топилган Салоҳ ва яна жароҳат олган Остон Ўрунов. Энг сўнгги спорт янгиликлари

Дунё ва ўзбек спортига оид 30 ноябрь тонгининг энг муҳим хабарлари дайжести билан танишинг.

Ўзбекистон

Ўзбекистон футбол ассоциациясининг мажлислар залида ЎФА президенти Абдусалом Азизов раислигида 2021 йилги мавсум якунлари ва кейинги йилги мавсум режаларига бағишланган йиғилиш бўлиб ўтди. Унда миллий чемпионатимизда тўп сураётган клубларнинг бош мураббийлари, жисмоний тайёргарлик ва илмий-методик таҳлил бўйича мутахассислари иштирок этди. ЎФА раҳбари футболчиларнинг бетартиб трансферлар натижасида доимий клубларни алмаштириши, бунда ўсиш ва юқори натижа қайд этиш асосий мақсад бўлмаётганлигини танқид остига олди. Масъулларга кейинги мавсумдан трансферлар жараёнини қаттиқ назорат остига олиниш топшириғи берилди. Шунингдек легионерларни олиб келишда уларнинг даражаси ва савиясига алоҳида эътибор қаратилиши кераклиги таъкидланди.

Абдусалом Азизов кейинги мавсумда иштирок этадиган клублар сони ўзгартирилмаслиги, барча режалар регламент асосида ташкил этилишини маълум қилди. Янги мавсумдан бошлаб клублар учун бир қатор стандартлар жорий этилиши, хусусан, футболчилар учун жисмоний тайёргарликнинг минимал даражаси талаблари белгиланиши ва майдонлар ҳолати қатъий назорат остига олинишини айтди.

Ўзбекистон терма жамоаси 2022 йил бошида иккита ўртоқлик ўйини ўтказади

Сречко Катанец қўл остидаги Ўзбекистон миллий терма жамоаси январь февраль ойида ташкил этиладиган йиғин доирасида иккита ўртоқлик учрашувида майдонга тушади. «Оқ бўрилар» 21 январь куни Токиода Япония терма жамоасига қарши ўйин ўтказса, 1 февралда БААда Янги Зеландия билан ўйнайди.

Остон Ўрунов яна жароҳат олди

«Уфа» ярим ҳимоячиси Остон Ўрунов РПЛ 16-туридан ўрин олган «Спартак»ка қарши ўйинни (1:1) муддатидан олдин якунлади.

Футболчи жароҳати туфайли майдонни тарк этишга мажбур бўлди. 25-дақиқада унинг ўйинни давом эттира олмаслиги маълум бўлган. Ҳозирча жароҳатнинг қай даражада жиддий экани номаълум.

Жаҳон

29 ноябрь оқшомида France Football томонидан йилнинг энг яхшилари тақдирланди. Унга кўра, йилнинг энг муҳим соврини «ПСЖ» вакили Лионель Мессига насиб этди. Месси еттинчи марта ушбу совринга эга чиқди ва бу борада мутлақ рекордчи ҳисобланади.

Унинг асосий рақобатчиси Роберт Левандовски («Бавария») эса энг яхши ҳужумчи совринига эга бўлди.

Ралф Рангник «Манчестер Юнайтед» бош мураббийи этиб тайинланди

Германиялик мутахассис «Манчестер Юнайтед» бош мураббийлиги лавозимида мавсум охиригача фаолият юритади. Ундан кейин икки йил давомида маслаҳатчи сифатида ишлайди.

Рангник 2021 йилнинг февраль ойидан ҳозиргача «Локомотив Москва» клубида спорт ва ривожланиш бўлими раҳбари сифатида ишлаб келаётганди.

Клублар ўртасидаги Жаҳон чемпионатининг қачон ўтказилиши маълум қилинди

ФИФА клублар ўртасидаги Жаҳон чемпионати санасини тасдиқлади. Унга кўра, мусобақа 2022 йилнинг 3—12 февраль кунлари БААда бўлиб ўтади.

Унда «Палмейрас» (Бразилия), «Челси» (Англия), «Ал-Ҳилол» (Саудия Арабистони), «Ал-Аҳли» (Миср), «Монтеррей» (Мексика), «Окленд» (Янги Зеландия) ва «Ал-Жазира» (БАА)

Муҳаммад Салоҳ англиялик мухлислар танловига кўра йилнинг энг яхши ўйинчиси бўлди

«Ливерпуль» ҳужумчиси Англия ва Уэльс футбол мухлислари ассоциацияси талқинига кўра 2021 йилнинг энг яхши ўйинчиси деб топилди. Мисрлик футболчи бу совринни иккинчи марта қўлга киритди. Салоҳ 2018 йилда ҳам ушбу совринга эга чиққанди.

Муҳаммад соврин учун курашда Мэйсон Маунт («Челси»), Микаил Антонио («Вест Ҳэм»), Фил Фоден, Рубен Диаш (иккиси – «Манчестер Сити») ва Юри Тилемансни («Лестер») ортда қолдирди.

Неймар камида 1,5 ойга сафдан чиқди

«ПСЖ» жароҳатда бўлган бир қатор футболчилар ҳақида маълумот берди. «Сент-Этьенн»га қарши ўйинда (3:1) Неймар чап оёқ болдир ошиғидан жароҳат олган ва унинг тикланишига 6–8 ҳафта вақт кетади. Бир неча кундан кейин бразилиялик футболчи яна кўрикдан ўтади ва шундан кейин тикланиш жараёни қанча вақт олиши аниқ бўлади.

Шунингдек, лазаретда бўлган Марко Верратти ва Мауро Икарди машғулотларга қайтган. Жоржиньо Вейналдум пайшанба кунидан шуғулланишни бошлаши айтилган. Тикланиш жараёнига қараб, Андер Эррера ҳафта охирида машқларни бошлаши мумкин, Юлиан Дракслернинг тикланишига ҳали 2-3 ҳафта вақт бор.