Эктор Купер бошлиқ Ўзбекистон миллий терма жамоаси ФИФА кунлари доирасида 16 октябрь куни Тошкентда Қатар термасига қарши ўртоқлик ўйинида майдонга тушади. Ўйин олдидан бугун Эктор Купер ва терма жамоа аъзоси Одил Ҳамробеков матбуот анжуманида иштирок этди.
— Эртага бу йиғиндаги иккинчи ўйинда майдонга тушамиз. Бу учрашувда биринчи ўйиндаги яхши жиҳатларни сақлаб қолиш ва уни давом эттиришга ҳаракат қиламиз. Ундан ташқари биринчи ўйинда камроқ ўйнаган футболчилар Қатар билан кўпроқ ҳаракат қилишади. Бу дегани таркиб бутунлай ўзгариб кетади дегани эмас. Бу ўйиндан кейин футболчилар ўз клубларига кетишади. Бир ойдан кейинги йиғинда ҳам бу ўйинчилар терма жамоадаги услубни ёддан чиқармаган ҳолда келишларини истардим.
— КХДР билан ўйинда қатарлик видеотасвирчи стадионга келиб ўйинни видеога олди. Улар ўз гуруҳдоши КХДРни ўрганишни бошлашган. Бизнинг гуруҳда Япония, Уммон ва Туркманистон бор. Ўз рақибларимизни ўрганиш жараёни бошландими?
— Албатта, рақибларимизни ўрганамиз. Бугунги кунда ахборот технологиялари ривожланиб кетган. Шу боис стадионга бормай туриб ҳам видеони кўриш мумкин. Кейинги ўйинларда ўз вакилларимизни рақиб жамоа ўйинларига юборамиз. Бундан ташқари ҳозирги пайтда биринчи навбатда ўз ўйинимизга қаратяпмиз. Рақибларимиз ҳақида барча маълумотлар бор.
— Ливан терма жамоаси бош мураббийи Миодраг Радулович ноябрь ойида Австралияда Ўзбекистон билан ўйнаймиз деб интервью берди. Ростдан ҳам бу ўйин бўладими ёки йўқми?
— Бизга 15 ноябрь куни Ливан билан ўйнаймиз деган маълумот берилган. Агар қандайдир ўзгариш бўлган бўлса бундан хабаримиз йўқ.
— Сардор Рашидов бу йиғинга чақирилмагани сабаби жароҳатми ёки Эрон билан ўйиндаги ҳимоявий кўрсатмаларни бажармаганидами?
— Мен Ўзбекистон терма жамоа билан шартнома тузаётганда ҳеч ким мана шу футболчилар доим термага чақирилиши керак деб айтмаган. Бу йиғинга чақирилмагани билан бўлди терма жамоага чақирилмайди дегани эмас. Ҳеч қайси футболчига терма жамоадан жой кафолатланмаган.
— Сиз асосан 4-2-3-1 тактикасидан фойдаланаяпсиз. Осиё Кубогига қадар захира тактикаларини ҳам қўллаб кўрасизми?
— Ҳозир футболчиларга кўплаб тактикалар бериб ташласам улар нима қилишни билмай қолишади. Эрон билан ўйинда нимага ютқаздик? Кўрсатмаларни охиригача тўғри бажаришмагани учун ютқаздик. Менинг тактикам барчага ёқмаслиги аниқ. Мен 100 миллион аҳолиси бор мамлакат терма жамоасини бошқарганман. Энди 100 миллион одамга ёқадиган тактика борми айтингчи? Агар барчаси яхши бўлса, яъни Осиё Кубогини қўлга кирицак ёки Жаҳон чемпионатига чиқсак тактика иш бераётган бўлади. Агар бундай бўлмаса тактикани ўзгартириш керак бўлади.
— ЎФА расмий Виталий Денисов октябр ойидаги йиғинга жароҳати боис чақирилмади деб ёзди. Лекин ўз клубида ўйнади. У ростдан ҳам жароҳати боис чақирилмадими ёки бошқа сабаб борми?
— Менга Денисовда жароҳат бор деб айтишди. Клубида ўйнаган бўлса ҳеч нима қила олмаймиз. У айнан жароҳати боис октябрь ойидаги йиғинга чақирув олмади.
— Эртага бизни қизиқарли ўйин кутиб турибди. Қатар билан ўйинлар доим қизиқарли ўтган. Араб давлати жамоалари доим ҳужумкор ўйин намойиш этишган.
— КХДР билан ўйиндан сўнг кўплаб жамоадошларингиз майдондан нолишди. Сиз ҳам ушбу майдонда ўйнаган футболчи сифатида нима дея оласиз?
— Майдон ҳолатини жуда ёмон деб ҳам бўлмайди. Четдан келаётган жамоалар учун ҳам, биз учун бу ерда ўйнаш ноқулай бўлмоқда. Майдон идеал футбол намойиш этиш учун имкон бермаяпти. Барча кўриб турибди чим кўчииб кетмоқда. Бу нарса натижага баҳона бўла олмайди, шунчаки барча кўриб турган ҳолатни айтаяпман.
Одил Ҳамробеков, Ўзбекистон миллий терма жамоаси ярим ҳимоячиси
Изоҳ (0)