Осиё Кубоги бошланишига ҳам саноқли соатлар қолмоқда. Аслида, орадан 5 йил ўтиб бўлиб ўтадиган мусобақага эътибор ва қизиқиш ҳар доимгидан ҳам жиддий. Бунга бир нечта сабаблар бор.
Жумладан, Қатар Жаҳон Чемпионатидан сўнг иккинчи катта мусобақани ўзида ўтказмоқда ва ташкилотчилик аввалгиларига қараганда анчагина яхшиланган. Шунингдек, мусобақа фаворити сифатида кўрилаётган терма жамоалар сони кўп. Дунёнинг жаҳонга машҳур Opta портали суперкомпьютердан фойдаланган ҳолда қитъа Кубогидаги терма жамоаларнинг чемпионлик имкониятларини ҳисоблаб чиқди.
Унга кўра, Японияда имконият 24,6 %, Жанубий Кореяда 14,3 %, Эронда 11,2 %, Австралияда 10,7 %, Саудия Арабистонида 10,6 %, Қатарда эса 9,8 %. Қолган 18 та терма жамоада имкониятлар 3 фоиздан пастга баҳоланган. Ўзбекистон терма жамоасида имконият 2,5 % этиб белгиланган бўлса, энг паст кўрсаткич Гонг Конгда – 0,1 %.
Хўш, Ўзбекистон миллий терма жамоасининг яқин тарихдаги Осиё Кубокларида иштирокидаги эътиборга молик ҳолатлар бўлган? “Дарё” шу ҳақда сўз юритади.
2-рақамли Бақоев, 4-рақамли Рашидов
Ҳужумчилар ва ярим ҳимоячилар спорт формасидаги рақам деганда кўз олдингизга қайси рақамлар келади? 7, 10, 11, 9 ва ҳоказо. 2, 3, 4 ва 5-рақамларни эса деярли ҳар доим ҳимоячилар олишади.
Ўзбекистон терма жамоаси сафида эса 2011 йилда Улуғбек Бақоев 2-рақамда ҳаракат қилган. Бугун мураббий сифатида фаолиятини олиб бораётган Бақоевнинг 2-рақамни олишига нима сабаб бўлганини биласизми?
Мусобақадан аввал ҳимоячи Ярослав Крушелниский жароҳат оган ва унинг ўрнига Бақоев қайдномага киритилган. Дарвоқе, Улуғбек Бақоев ўша мусобақада Иордания билан қанақа ўйин ўтказганини барча яхши эслайди.
2015 йили Австралияда бўлиб ўтган Осиё Кубогида Сардор Рашидов 4-рақамда ҳаракат қилган. Ўша мусобақа Рашидовни оламга танитганди.
Ҳа, у вақтгача ҳам Сардор ўзининг чиройли ўйинлари билан кўпчилик эътиборига тушиб улгурган эди, бироқ гуруҳнинг 3-тур ўйинида Саудия Арабистонига урган икки голи барчанинг қалбида қолганди.
Марказий ҳимояда ўйнаган Одил Аҳмедов
Кўпчиликнинг ёдида бўлса керак, Аҳмедов 2011 йилги Осиё Кубогида марказий ҳимоячи ролида ҳаракат қилган.
Бунга сабаб сифатида, кейинчалик, Вадим Абрамов шундай хотирлайди:
“Ўша вақтда биринчи пасни аниқ берадиган ҳимоячи йўқ эди, шунинг учун Одилни ўйнатишга мажбур бўлганман. Аҳмедов мусобақадан олдин ёнимга келди. Марказий ҳимояда жой бўлмаса захирада ўтиришга тайёр экани ва бундан хафа бўлмаслигини айтди. Мен эса гап бу ерда эмаслигини Германия мисолида унга тушунтирдим.
Германия уч бор Жаҳон Чемпионига айланган мусобақаларни эслаймиз: бирида Франс Беккенбауэр ярим ҳимоядан марказий ҳимояга олинади. Иккинчисида жамоанинг энг ёрқин ярим ҳимоячиларидан бири Маттиас Заммер марказий ҳимоячига айлантирилади. Учинчисида плеймекер Лотар Маттеусни марказий ҳимояга олишади. Шуларни айтиб унга тушунтирдим ва Одил ҳимояда ўйнашга рози бўлди.
Ўртада биргина тушунмовчилик бор. Менга маълум бўлишича, ўша ерда кимдир Австралияга қарши ўйин олдидан унга “сен ярим ҳимоячисан ва ҳужумга ўтишинг керак”, деган. У олдинга кўп ўтиб кетди ва бунинг ортидан бизда муаммолар пайдо бўлди. Агар адашган бўлсам, унинг ўзи тўғрилаши мумкин”.
Марказий ҳимояда ўйнашига қарамай, Одил Аҳмедов барибир ўзининг севимли жойи – ярим ҳимояга яқин ўйнади. Қатарга урган супер голини эса ҳали ҳамон, барча яхши эслайди.
“Лотерея”лардаги омадсиз Бикмаев
Марат Бикмаевни нафақат терма жамоа, балки клублар сафида ҳам яхши ҳужумчи сифатида билганмиз. 2023 йилда “буцасини михга илган” футболчи миллий терма жамоа сафида жами 58 ўйинда майдонга тушиб, 9 та гол уришга муваффақ бўлган.
Бироқ, Бикмаевнинг айни терма жамоа билан боғлиқ иккита ҳолати ўзбек мухлислари қалбида қолган. Иккиси ҳам пенальтилар сериясига оид.
Биринчиси, 2004 йилги Осиё Кубоги доирасида чорак финалда Баҳрайнга қарши ўйин ўтказган. Ўйиннинг асосий вақти 2:2 ҳисобида якунлангач, ғолиб номи пенальтилар сериясида аниқланиши керак эди. Андрей Фёдров, Александр Гейнрих, Сервер Жепаров уччаласи дастлаб пенальтини аниқ амалга оширишди. Аммо, тўртинчи зарбада адашилди. Зарба муаллифи – Бикмаев эди. Бешинчи зарбани амалга оширган Кошелёв ҳам адашди ва натижада Ўзбекистон мусобақадан хайрлашди.
Иккинчи ҳолат – ҳозирча сўнггиси бўлиб турган Осиё Кубогида содир бўлди. Бу сафар рақиб – Австралия. 120 дақиқа 0:0 ҳисоби сақланиб турди, пенальтилар сериясига навбат етиб келди. Тўртинчи зарбагача ҳар икки жамоа ҳам биттадан зарбани аниқ амалга ошира олмади. Тўртинчи зарбани эса яна Бикмаев тепди ва яна адашди.
Нестеров мутлақ етакчи
Игнатий Нестеровни ўзбекистонлик футбол мухлислари яхши кўришади. Бугалонинг ўрнини муносиб тарзда эгаллаган, айримлар эса, Нестеровдан кейин Ўзбекистонда яхши дарвозабон бўлмаганини айтиб келади.
Нестеров эса Осиё Кубокларида рекордчи. У 5 та Осиё Кубогида иштирок этган ягона футболчига айланди. Игнатий Нестеров 2004, 2007, 2011 ва 2015 йиллардаги Осиё Кубогида ўйнаган.
ОФК матбуот хизмати ҳам бу статистикага кўп бора эътибор бериб, ижтимоий тармоқлардаги саҳифаларида бу ҳақда маълумот чиқариб келмоқда.
Кичик статистика
Ўзбекистон терма жамоаси бугунгача 7 та Осиё Кубогида иштирок этиб, жами 28 та ўйин ўтказган. Ўтказилган ўйинларнинг 13 тасида ғалаба, 4 тасида дуранг ва 11 тасида мағлубият қайд этилган. 42 та гол уриб, 47 та ўтказиб юборилган.
Оғабек Самисов тайёрлади
Изоҳ (0)