Сўнгги йилларда аксарият ўзбек футболчиларининг мақсади пойтахт клублари билан шартнома имзолаш бўлиб қолгани ҳеч кимга сир эмас. Буни тўғри тушуниш мумкин, боиси айнан Тошкент клублари орқали терма жамоага чақирилиш ёки хорижга йўл олиш мумкин. Тўғри, вилоят жамоаларидан ҳам футболчилар термага чақирилган ва чақирилмоқда. Бироқ тан олиш керак, охирги йилларда айнан «Пахтакор» ва «Бунёдкор» футболчилари (ёки ушбу клубларда ўйнаб кетган легионерлар) терма жамоанинг асосини ташкил қилиб келади. Шу билан бирга ушбу жамоалар ўртасидаги баҳслар ҳар доим принципиал аҳамият касб этиб келган. «Тошкент дербиси» деб ном олган қарама-қаршилик 2010 йилларда ўз чўққисига эришган. Ўша пайтлардаги учрашувлар том маънода шиддатли тарзда ўтар ва ҳозиргидан фарқли ўлароқ мухлислар ташрифи ҳам мақтанишга арзийдиган эди. Дерби мақомида ўтган ўйинлар икки жамоа футболчилари очиқчасига даҳанаки жангларга киришиб кетган ҳолатларга тўла бўлган. Улар учун ўз клуби шаъни ва унинг ғалабаси биринчи ўринда бўлган. Аммо яна шундай футболчилар ҳам борки, улар фаолиятида давомида ҳам «Бунёдкор», ҳам «Пахтакор» сафида тўп суришга муваффақ бўлган. «Дарё» қуйида айнан шундай ўйинчиларга тўхтатилиб ўтади.
Игнатий Нестеров
Ўзбекистон миллий терма жамоасининг собиқ дарвозабони Игнатий Нестеров «Пахтакор»даги фаолиятини 2002 йилда бошлаган ва 2009 йилгача «шерлар» шарафини ҳимоя қилган. 2009 йилда эса у «Бунёдкор» сафига қўшилади. Шундан сўнг посбон пойтахтнинг бошқа бир клуби «Локомотив»да ҳам тўп суришга улгурди. Ҳозирда Нестеров фаолиятини «Қизилқум»да давом эттирмоқда.
Анзур Исмоилов
Ўзбекистоннинг кам сонли бўйдор футболчиларидан бири бўлган Анзур Исмоилов 2003 йилда «Пахтакор» сафида дебют қилади ва 2010 йилгача ушбу клуб шарафини ҳимоя қилади. 2010 йилда эса «Пахтакор»нинг кўпчилик футболчилари сингари «Бунёдкор»га ўтишни маъқул кўради. Анзур «қалдирғочлар» сафида узоқ ушланиб қолмайди ва 2011 йилда Хитой клубига йўл олиб, у ерда 2018 йилгача ҳаракат қилади. Шундан сўнг орада бир-икки мавсум «Локомотив»да тўп суради ва 2020 йилнинг аввалида яна «Пахтакор»га қайтди.
Сервер Жепаров
Профессионал фаолиятини «Навбаҳор»да бошлаган Сервер Жепаров 2002 йилда «Пахтакор»га ўтиб, 2008 йилда «Бунёдкор» сафига қўшилади. 2010 йилгача «Бунёдкор»да тўп сурган Жепаров шундан сўнг легионер сифатидаги фаолияти бошлайди. Унинг резюмесида «Сеул» (Жанубий Корея), «Аш-Шабоб» (Саудия Арабистони), «Соннам» (Жанубий Корея), «Истиқлол» (Эрон) ва яна бир қатор хориж клублари ўрин олган. Сервер фаолиятини 2019 йилда «Металлург»да якунлашга қарор қилади.
Тимур Кападзе
Тимур Кападзе фаолиятини «Нефтчи»да бошлаган. 2002 йилда эса «Пахтакор»га ўтади ва у ерда 2008 йилгача тўп суради. Ўша йили эса «Бунёдкор» сафига бориб қўшилади. 2011 йилги Осиё Кубогидан сўнг Тимур ҳам легионерга айланади ва Жанубий Корея, БАА, Қозоғистон каби давлатларда тўп суриб қайтади. 2018 йилда Тошкентнинг «Локомотив»ида бутсаларини михга илган Кападзе дарҳол мураббийлик фаолиятини бошлади. Ҳозирда у «Олимпик» клубига устозлик қилмоқда.
Анвар Солиев
Фаолиятини «Навбаҳор»да бошлаб, кейинчалик «Пахтакор» ва «Бунёдкор»да ўйнаган футболчилардан яна бири Анвар Солиевдир. 2001 йилда «шерлар» сафида дебют қилган Солиев рўйхатдаги аксарият футболчилар сингари 2008 йилда «Бунёдкор»га ўтади. 2013 йилда эса яна «Пахтакор»га қайтади ва 2017 йилда ўша ерда фаолиятини якунлайди.
Ислом Иномов
Курашларда ўзини аямаслиги ва фидоийлиги билан машҳур бўлган Ислом Иномов 2004 йилдан (танаффуслар билан) 2009 йилгача «Пахтакор»да ўйнаган. Унинг «Бунёдкор»даги фаолияти эса 2014 йилда бошланиб, 1 йил давом этган.
Акмал Шораҳмедов
Ўзбек мухлисларига кўпроқ Жанубий Кореяга қарши ўйиндаги автоголи билан таниш бўлган Акмал Шораҳмедов «Бунёдкор»даги 6 йиллик фаолиятидан сўнг (2011 —2017 йиллар) бир мавсум «Насаф»да ўйнайди ва шундан сўнг «Пахтакор» сафига қўшилади. Унинг «шерлар» таркибидаги фаолияти ҳам бир мавсум давом этган. Шораҳмедов ҳозирда Фарғонанинг «Нефтчи» клуби шарафини ҳимоя қилмоқда.
Сардор Рашидов
Тезкорлиги ва ўйинни ўзига олишдан қўрқмаслиги орқали бир вақтлар ўзбек футболининг келажаги сифатида қаралган Сардор Рашидов ҳозиргача бир қатор клубларда тер тўкишга улгурди. 2009 йилда «Бунёдкор» сафида дебют қилган Сардор 2015 йилгача «қалдирғочлар» таркибида жавлон уради. Шундан сўнг Рашидовнинг хориждаги фаолияти бошланади. Қатар, БАА ва Португалия жамоаларидан сўнг Сардор 2021 йилда яна Ўзбекистонга қайтди. Фақат бу сафар уни «Пахтакор» ўз сафига қўшиб олди. «Шерлар» сафида ярим мавсум ўйнаган Рашидов июль ойида яна легионерга айланди. Кувайтнинг «Кувайт СК» клуби Рашидов билан 1 йиллик шартнома имзолади.
Достон Ҳамдамов
«Бунёдкор» академияси тарбияланувчиси ҳисобланган Достон Ҳамдамовдан ҳам Сардор Рашидовдан кам ўйин кутилмаган эди. Ҳатто Ҳамдамов 2015 йилда Осиёнинг энг яхши ёш ўйинчиси ҳам бўлган. 2018 йилда эса у легионерга айланади, аммо Россиянинг «Анжи» клубида ишлари юришмайди ва «Пахтакор»га ўтади. 2021 йилнинг бошида Достон яна хорижга йўл олди. БААнинг «Ан-Наср» клуби футболчи билан шартнома имзолаб, уни «Ҳатта»га ижарага бериб юборди. Бироқ унинг амирликлардаги фаолияти ҳам қисқа бўлди ва 23 июль куни яна «Пахтакор»га қайтди.
Акром Комилов
Акром Комилов ҳам «Бунёдкор» тарбияланувчиси ҳисобланади, фаолиятини ҳам айнан «қалдирғочлар» сафида бошлаган. 2015 йилдан 2019 йилгача профессионал мақомда «Бунёдкор»да ўйнаган Комилов 2019 йилда «Пахтакор»га ўтади. 2021 йилнинг бошида эса «шерлар» таркибидаги кучли рақобат туфайли Олмалиқнинг «ОКМК»сига йўл олди.
Сардор Собирхўжаев
«Бунёдкор» академиясида тарбияланиб, «Пахтакор»да ўйнаётган футболчилардан яна бири Сардор Собирхўжаев 2014 йилда «қалдирғочлар»нинг асосий жамоасига қабул қилинади ва 2016 йилгача у ерда тўп суради. 2016 йилда эса «Бунёдкор»дан кетиб, бир қатор жамоаларда фаолият юритади. Аммо 2017 йилда яна «Бунёдкор»га қайтади. 2019 йилда эса «Пахтакор» уни сафига қўшиб олади.
Иброҳимхалил Йўлдошев
Ва ниҳоят, ушбу рўйхатдаги энг ёш (20 ёш) вакил Иброҳимхалил Йўлдошев пойтахтнинг ҳар иккала клубида ҳам тўп тепишга муваффақ бўлган. «Пахтакор» 2020 йилда ўз тарбияланувчисини мунтазам ўйин амалиётига эга бўлиши учун «Бунёдкор»га мавсум сўнгига қадар ижарага беради. 2021 йилги мавсумдан бошлаб эса у қадрдон жамоаси шарафини ҳимоя қилмоқда.
Йўлдошев чап қанотдаги ишончли ҳаракатлари орқали Италиянинг «Женоа» клуби скаутлари эътиборига тушди. Ҳимоячининг трансфери борасидаги музокаралар билан ProSportManagement ва Валерио Жуффрида шуғулланаётгани айтилди. Қайд этиш жоиз, айнан улар Шомуродовнинг «Женоа»га ўтишида ҳам ишлаган эди.
Билол Эркин тайёрлади
Изоҳ (0)