Мажбурий ижро бюросининг Улуғнор тумани бўлими томонидан ишчисининг маошидан алимент қарзини ушлаб қолмаган фермер хўжалиги раҳбари жазога тортилиб, автомашинаси хатланди. Бу ҳақда “Дарё”га МИБ вилоят бошқармаси ахборот хизмати хабар берди.
Маълум бўлишича, Улуғнор туманида яшовчи М.А. суд қарорига асосан икки нафар фарзанди учун алимент тўлаб бориши белгиланган бўлиб, алимент қарзи ва тўловлари унинг иш ҳақига қаратилган.
Бу бўйича бюронинг Улуғнор туман бўлими давлат ижрочиси томонидан алимент тўловчи М.А.нинг иш жойи, яъни фермер хўжалиги раҳбарига талабнома юборилган. Бироқ фермер давлат ижрочисининг қонуний талабларини бажармасдан, тўланиши керак бўлган алимент пулларини қарздорнинг иш ҳақи даромадларидан ушлаб қолмаган.
Натижада фермер хўжалиги раҳбари М.Т. базавий ҳисоблаш миқдорининг 10 баравари, яъни 3 750 000 сўм миқдорида жаримага тортилиб, унга тегишли Damas автомашинаси хатланди.
Хатлаш жараёнида фермер жарима пулларини тўлаб, ишчисининг октябрь ойи иш ҳақи тўловларидан алимент қарзи учун маблағ ўтказилишини айтиб, бундай ҳол бошқа такрорланмаслигини билдирган.
Изоҳ (0)