Фарғонада алиментдан қочиб юрган эркак Тошкентдаги уй қудуғидан топилди, деб хабар бермоқда МИБ ахборот хизмати “Дарё”га.
Маълум қилинишича, Мажбурий ижро бюроси Фарғона вилоят бошқармаси қидирув шўбаси инспекторлари томонидан олиб борилган навбатдаги тадбир давомида фарзандининг моддий таъминотидан бўйин товлаб юрган қарздор яшаш хонадонидаги қудуқдан топилди.
Олтиариқ туманида яшовчи фуқаро турмуш ўртоғи билан оилавий келишмовчиликлар сабаб ажрашиб кетган ва иккинчи томон фарзандини моддий таъминламай қўйган. Шундан сўнг, она ўз ҳуқуқидан фойдаланган ҳолда фарзанди ҳақини талаб қилиб судга мурожаат этади. Суд қарорига кўра, ундирувчи аёл фойдасига икки нафар фарзандлари учун ҳар ойда алимент ундириш тартиби белгиланади.
Суд ижро ҳужжати Бюронинг Олтиариқ туман бўлими иш юритувига келиб тушган ва ижро ҳаракатларига киришилган. Қарздорлик 10 миллион сўмдан ортиб кетди. Ишлаш мақсадида Тошкент шаҳрига бориб, беркиниб юрган.
Унга нисбатан давлат ижрочиси томонидан қидирув эълон қилинди. Бошқарма инспекторлари ҳуқуқни муҳофаза қилиш идоралари ходимлари билан ҳамкорликда топиш чорасини олиб борди.
Бу натижа бериб, Тошкент шаҳридан яшаш хонадонига келгани маълум бўлди. Ходимлар олинган тезкор маълумотларга кўра яшаш хонадонга борганда, оила аъзолари унинг келмаганини билдирган. Бироқ хонадон яшаш жойлари пухта кўздан кечирилганда, қарздор янги ковланаётган қудуқ ичидан топилган.
Қидирувдаги шахс белгиланган тартиб бўйича давлат ижрочисига топширилди.
Алиментдан қочган оталар ҳақида
Наманган вилояти Чортоқ туманида алимент тўлашдан қочиб юрган эркак уй ертўласидан топилганди. Қарздор ота томонидан қарздорлик 20 миллион сўмдан ортган. Ишлаш мақсадида Тошкент шаҳрига кетгач, унга нисбатан қидирув эълон қилинган. Ходимлар томонидан Тошкентдаги хонадон яшаш жойлари пухта кўздан кечирилганда, ертўлага яшириниб олгани аниқланди. Унга нисбатан 15 суткалик маъмурий қамоқ жазоси тайинланди.
Қашқадарё вилояти Яккабоғ туманида алимент тўламай қочиб юрган эркак Тошкентдаги молхонадан топилган. Вояга етмаган фарзандлар учун тўланмаган алимент миқдори 3 миллион 200 минг сўм экани айтилган.
Шунингдек, Наманган вилояти Чуст туманида алимент тўлашдан қочиб юрган эркак Оҳангарондан топилган. Ўтказилган суҳбат мобайнида қарздорлик салкам 15 миллион сўмга етгани, уни бартараф этиш тушунтирилди. Қайд этилишича, у яна масъулиятни ҳис этмаган ва унга нисбатан жиноят иши юритилган.
Андижон вилояти Шаҳрихон туманида эса алимент тўлашдан қочиб, уйининг ертўласида яшириниб юрган эркак ушланиб, 15 суткага қамалган.
Энг антиқа ҳолатлардан бири, Наманган вилоятида алимент тўламай юрган эркак бошқа хотинининг уйида яширингани аниқланган. Ундан қарздорлик тўпланиб, 24,3 миллион сўмга бориб етган эди.
Шу каби, Қашқадарёда МИБ ходими 2 йилдан бери қидирувда бўлган қарздор эркакни беркинаётган жойида топиб олган. Тадбир жараёнида ходимлардан бири уйнинг болохонаси ва томини текшираётган пайтда, иккинчи ходим йиқитилган кўрпалар тагидан фуқарони олиб чиқди.
Шу куннинг ўзида қарздор мавжуд 28 миллион 971 минг сўм алимент қарздорлигини тўламагани сабабли Жиноят ишлари бўйича Яккабоғ туман суди томонидан Б.Бухаровга нисбатан 15 сутка маъмурий қамоқ жазоси тайинланди.
Сурхондарё вилояти Ангор туманида алимент тўламай, 2 йилдан буён қидирувда бўлган эркак уй ертўласидан топилган.
Тошкентда учта хотинига алимент тўламаган эркакнинг қарзини 4-хотини тўлагани ҳақидаги ҳолат ҳам кузатилган. Шундан сўнг суд томонидан қарздорга нисбатан тўпланган ҳужжатлар қайта кўрилиб, етказилган зарар миқдори қоплангани сабабли 15 суткалик қамоқ жазосини тўлиқ ўтамасдан озод қилинган.
Изоҳ (0)