Андижонда қарздор онадан 2 нафар фарзанди учун 32 млн сўм алимент пули ундирилди. Бу ҳақда «Дарё»га МИБ Андижон вилояти бошқармаси ахборот хизмати хабар бермоқда.
Маълум қилинишича, фуқаро М.Н. эри И.Н. билан турмуши давомида уч нафар фарзанди дунёга келтирган. Аёл 2019 йилда фарзандларини отаси қарамоғига ташлаб, ўзи ишлаш мақсадида Россия Федерациясига чиқиб кетган. Шундан сўнг И.Н. 2020 йилнинг баҳорида аёлидан икки нафар вояга етмаган фарзандлари учун алимент ундириш масаласида судга мурожаат қилган.
Фуқаролик ишлари бўйича Асака туманлараро суди И.Н.нинг даъвосини қаноатлантириб, М.Н.дан унинг фойдасига икки нафар фарзандларининг моддий таъминоти учун алимент ундирилишини белгилаб берган.
Ижро ҳужжати Бюронинг Марҳамат туман бўлимига келиб тушгач, ижро ҳаракатларига киришилган. Бироқ қарздор 2023 йилга қадар Россия Федерациясида бўлгани сабабли алимент қарздорлиги тўпланиб, жами 32 млн. сўмга бориб етган.
Февраль ойида Бюро ходимлари томонидан аёлнинг қайтганлиги аниқланиб, қарздор М.Н.ги алимент тўламаслик қонунда белгиланган тартибда жавобгарликка сабаб бўлиши мумкинлиги тушунтирилган. Шунингдек, иш ҳужжатлари Жиноят ишлари бўйича туман судига юборилиши юзасидан огоҳлантирилган.
Шундан сўнг, оналик вазифасини бажармасдан эрига болаларини ташлаб кетган М.Н. қонуний мажбуриятларини англаб етиб, фарзандлари таъминоти учун 32 миллион 800 минг сўм алимент пулларини тўлаб бериши таъминланган.
Изоҳ (0)