Қашқадарё вилоятида МИБ ва унинг мансабдорлари, “Агробанк”, шунингдек, банкнинг вилоятдаги масъуллари билан судлашиб юрган тадбиркор-фермер қамоққа олингани айтилмоқда. Бу ҳақда “Дарё”га унинг опаси маълумот берди.
Судда мансабдорларга қарши курашаётган фермернинг опаси Гулчеҳра Болтаеванинг айтишича, укаси 29 октябрь куни эрталаб туман прокуратурасига чақирилган ва ўшандан бери йўқ.
Ашур укам “Самандар-нур” фермер хўжалиги раҳбари эди. У МИБ ва “Агробанк” мансабдорлари билан судлашиб юрганди. 29 октябрь куни туман прокуратурасига чақирилганди. Ўшандан бери йўқ. 1 ноябрь куни суд бўлиши ва бу сафарги судда кўп нарса ҳал бўлиши керак эди. Кимдир укамни ичкарида олиб ўтиришдан манфаатдорга ўхшаяпти, дейди Гулчеҳра Болтаева.
“Дарё”да аввалроқ “Самандар-нур” фермер хўжалиги раҳбари Ашурали Болтаев МИБ янги тракторини сабабсиз олиб қўйиб, ноқонуний сақлаб тургани учун бюродан 355 миллион сўм зарарни ундириш бўйича судга мурожаат қилгани, дастлаб унга компенсация пули тўлиқ ундирилиши белгилангани, бироқ кўп ўтмай бу қарор ўзгариб, фермернинг МИБдан фақатгина 44 миллион сўмлик соф фойдаси ундириб берилгани хабар берилганди. Тадбиркор-фермер шунингдек, “Агробанк”нинг Нишон тумани филиали билан ҳам судлашаётгани, банк “Самандар-нур” фермер хўжалиги билан тузган 2020 йил 29 октябрь кундаги 784-сонли кредит шартномасига амал қилмай, белгиланган кредитни 93 кун кечиктириб бергани, бунинг учун ҳам банк фермерга жарима тўлагани очиқланганди.
“Дарё” журналисти тадбиркор-фермернинг ичкарига олиниши сабабини билиш мақсадида Қашқадарё вилояти прокуратураси ахборот хизмати масъули билан боғланди. Ахборот хизмати раҳбари вазифасини бажарувчи Диёрбек Амирқулов воқеага аниқлик киритиб, тез орада маълумот беришини айтди.
Изоҳ (0)