Андижон шаҳрида яшовчи фуқаро уч нафар фарзандини моддий таъминлашдан бўйини товлагани учун суд ҳукми билан 10 ой муддатга озодликдан маҳрум этилди. Бу ҳақда “Дарё”га МИБ вилоят бошқармаси ахборот хизмати хабар бермоқда.
Таъкидланишича, Фуқаролик ишлари бўйича Андижон туманлараро судининг 2019 йил 25 октябрдаги суд буйруғига асосан қарздор А.У.дан ундирувчи Д.У.нинг фойдасига уч нафар фарзандининг моддий таъминоти учун 1/2 қисм миқдорида алимент ундирилиши белгиланган.
Бироқ, 2021 йил 9 декабрь куни Мажбурий ижро бюроси Андижон шаҳар бўлими ходимлари томонидан А.У. устидан алимент пулларини тўлашдан бўйин товлаганлиги сабабли жиноят ишлари бўйича шаҳар судига тақдимнома киритилган. Тақдимномага кўра унга нисбатан Маъмурий жавобгарлик тўғрисидаги кодекснинг 47-4-моддасига (вояга етмаган ёки меҳнатга лаёқатсиз шахсларни моддий таъминлашдан бўйин товлаш) асосан 15 кунлик маъмурий қамоқ жазоси тайинланган.
Аммо А.У. бундан тўғри хулоса чиқармасдан, белгиланган жазони ўтаб бўлгандан сўнг ҳам алиментдан бўлган қарздорлигини тўламай келган. Натижада унинг алиментдан бўлган жами қарзи 19,4 миллион сўмга етган.
Ҳолат юзасидан А.У.га нисбатан жиноят иши қўзғатилиб, мазкур иш Жиноят ишлари бўйича Андижон шаҳар суди томонидан тегишли тартибда кўриб чиқилган. Суд ҳукми билан у Жиноят кодекси 122-моддасининг 1-қисмига асосан айбли деб топилиб, унга нисбатан 10 ой муддатга озодликдан маҳрум қилиш жазоси тайинланган.
Изоҳ (0)