Андижон вилоятида эркак собиқ хотини қарши бўлса ҳам 5 йиллик алимент пулини олдиндан тўлади. Бу ҳақда МИБ ахборот хизмати “Дарё”га хабар берди.
Маълум қилинишича, қўрғонтепалик Д.М.нинг касби сабаб малакасини ошириш учун йилига 2-3 маротаба хорижий давлатларга хизмат сафарига боришига тўғри келади. Бироқ, суд ҳужжатига кўра фарзандига алимент тўлагани учун четга чиқишига тақиқ ўрнатилган.
Д.М.нинг ҳам яқин кунларда Батумига хизмат сафари режалаштирилган. Шу сабабли, четга чиқиш истагида бўлган ота 5 йиллик алимент пулини олдиндан тўлашини билдирган.
Ижро этиш усулини ўзгартириш учун судга берилган ариза кўриб чиқилиш жараёнида ундирувчи I.Қ. бундан норози эканини маълум қилган. Бироқ суд иш ҳужжатларини ўрганиб чиқиб, Д.М.га 5 йил учун ҳисобланган 121,4 миллион сўм алиментни 10 кунда тўлашга ўзгартириш бўйича ажрим чиқарди.
Шундай қилиб, ота боласи учун 5 йиллик алимент пулларини олдиндан тўлаб берди ва унга қўйилган чекловлар бекор бўлди.
Изоҳ (0)