Грузия президенти Саломе Зурабишвили парламент сайловлари тан олинмаганини эълон қилди ва халқни оммавий намойишларга чиқишга чақирди.
“Бу сизнинг овозларингизни бутунлай сохталаштириш ва мусодара қилиш эди. Биз турли мамлакатларда кўрган барча усуллар қўлланди”, деди у.
Бир кун олдин бўлиб ўтган овоз беришдан кейинги биринчи мурожаатида Зурабишвили, унинг фикрича, Россия алоқадор бўлган қонунбузарликларни таъкидлаган.
“Биз халқимиз ва мамлакатимизга қарши гибрид урушнинг янги шаклларидан бири бўлган Россия махсус операциясининг гувоҳи ва қурбонига айландик”, дея қўшимча қилган президент.
Унинг таъкидлашича, “ушбу сайловларни тан олиш Россиянинг мамлакатга келишини, Грузиянинг Россияга бўйсунишини тан олиш билан баробардир”. Президент сайлов натижаларидан норози бўлган барчани Тбилисидаги Руставели проспектида 28 октябрь куни кечқурун ўтказилиши режалаштирилган норозилик акциясида иштирок этишга чақирган.
Грузиянинг қамоқдаги собиқ президенти Михаил Саакашвили ҳам норозилик намойиши ўтказишга чақирган. У мухолиф партияларнинг парламент сайловларидан кейин депутатлик мандатларидан воз кечиш қарорини қўллаб-қувватлаган.
“Албатта, ҳеч ким парламентга кирмаслиги керак! Ҳозир катта норозилик намойишларининг айни вақти. Биз бутун дунёга озодлик учун курашаётганимизни ҳамда биз адолатсизликка тоқат қилмайдиган халқ эканимизни кўрсатишимиз керак. Вақт жуда оз”, деб ёзган Саакашвили Facebookъдаги саҳифасида эълон қилган баёнотида.
Изоҳ (0)