Грузия парламенти 1 май куни бўлиб ўтган йиғилишда “Хорижий таъсирнинг очиқлиги тўғрисида”ги қонун лойиҳасини иккинчи ўқишда қабул қилди. Бу ҳақда тегишли манбаларга таяниб, Meduza хабар берди.
Биринчи ўқишда бўлгани каби, ҳужжатни 150 нафар депутатдан 83 нафари – “Грузия орзуси” партияси ва унинг коалициядаги ҳамкори “Халқ кучи” партияси аъзолари қўллаб-қувватлаган.
Учинчи ўқиш шартли равишда 17 майга белгиланган.
Минглаб одамлар парламент биноси олдидаги майдонга аввалги бир неча кундагидек тўпланиб, қонун лойиҳасининг қабул қилинишига норозилик билдирган.
Грузия президенти Саломе Зурабишвили аввалроқ қонун қабул қилинса, вето қўйишга ваъда берган эди. Айни пайтда ҳукмрон партия президент ветосини бекор қилиш учун етарли овозга эга.
Қонун лойиҳасининг мухолифлари уни “хорижий агентлар тўғрисида”ги Россия қонунининг нусхаси деб аташган. Ҳужжат АҚШ ва Европада танқид қилинган. Европарламент норма қабул қилинган тақдирда Грузияни Европа Иттифоқига кириш учун номзод мақомидан маҳрум қилишни таклиф этган.
Изоҳ (0)