Европа Иттифоқи етакчилари Грузияни Тбилисида парламент учинчи ўқишда маъқуллаган баҳсли “хорижий агентлар” қонунини бекор қилишга чақирди, дея Deutsche Welle хабар берди.
15 май куни ЕИ дипломатияси раҳбари Жозеп Боррел ва Европа комиссари Оливер Вархели ушбу қонуннинг қабул қилиниши Грузиянинг ЕИга қўшилиш йўлидаги тараққиётига салбий таъсир кўрсатаётганини айтган.
Грузиянинг келажаги бўйича қарор ўзининг қўлида. Биз Грузия ҳукуматини қонунни бекор қилишга, ЕИга аъзолик бўйича ўз мажбуриятларини сақлаб қолишга ва тўққиз босқичда баён қилинган зарур ислоҳотларни илгари суришга чақирамиз, — дейилади қўшма баёнотда.
Евроиттифоққа раислик қилаётган Бельгия Грузия парламенти томонидан “хорижий агентлар” тўғрисидаги қонун қабул қилинганидан афсусда эканини билдирган.
Аввалроқ Грузия парламенти “хорижий агентлар” ҳақидаги қонун лойиҳасини учинчи ўқишда қабул қилган эди. Янги қоидага кўра, молиясининг 20 фоиздан кўпроғини хориждан оладиган нодавлат нотижорат ташкилотлари ва ОАВлар “хорижий агент” сифатида рўйхатдан ўтишлари шарт.
Грузия омбудсмани Леван Иоселияга кўра, бир ой давомида намойишларда 160 га яқин намойишчи ҳибсга олинган, ўнлаб намойишчилар полиция томонидан калтакланган.
Грузия 2023 йил декабридан Европа Иттифоқига номзод аъзо. Бу мақом Тбилисига фақат Еврокомиссия томонидан тавсия этилган тўққизта босқич зарурий бажарилиши шарти билан берилган. Фуқаролик жамияти, инсон ҳуқуқлари ва ОАВнинг эркинликларини ҳимоя қилиш шулар жумласидандир.
Изоҳ (0)