Грузия бош вазири Ираклий Кобахидзе АҚШга боришдан бош тортди. Бу ҳақда мамлакат Ташқи ишлар вазирлиги хабар берди.
Кобахидзе ташрифни рад этишига АҚШ Грузиядан хорижий агентлар ҳақидаги қонун лойиҳасини кўриб чиқишни тўхтатиб туришни талаб қилаётгани сабаб бўлди. Вашингтон 2 май куни Грузия ҳукуматининг юқори мартабали вакилларини мамлакатга ташриф буюришга таклиф қилди. Бироқ рад жавобини олди.
Ташрифни шартлар асосида ўтказиш ўзаро ҳурмат ва ишончга асосланиши керак бўлган ҳамкорлик руҳига тўғри келмайди, — дейилади Грузия Ташқи ишлар вазирлиги баёнотида.
1 май куни “Хорижий таъсирнинг шаффофлиги тўғрисида”ги қонун лойиҳаси Грузия парламенти томонидан иккинчи ўқишда қабул қилинди. Йиғилиш вақтида парламент яқинида норозилик намойиши бўлиб ўтди, полиция намойишчиларни сув пуркагичлар ва кўздан ёш оқизувчи газ билан тарқатди. АҚШ элчихонаси қонун лойиҳасига қарши чиққанларни қўллаб-қувватлади.
Изоҳ (0)