АҚШ Грузияда қабул қилинган “хорижий агентлар” тўғрисидаги қонун туфайли Тбилиси ҳукумати расмийларига нисбатан виза чекловлари жорий этди. Бу ҳақда АҚШ Давлат департаменти матбуот учун эълон қилган ҳисоботига асосланиб, Anadolu нашри хабар берди.
Манбада айтилишича, виза чекловлари “Грузия орзуси” партияси аъзолари, парламент аъзолари ва ҳуқуқ-тартибот идоралари ходимларига қаратилган. Эндиликда ушбу чеклов ўрнатилган фуқароларга АҚШ визаси берилмайди.
АҚШ Давлат департаменти ушбу янги тартибот 6 июнь куни кучга кирганини билдирган. Вашингтон Тбилисидаги ҳукуматнинг янги қонунига кескин қарши эканлиги билдирилган.
“Виза чекловларининг биринчи қисми “Грузия орзуси” партияси аъзолари, парламент аъзолари, ҳуқуқ-тартибот идоралари ва хусусий фуқароларни ўз ичига қамраб олади”, — деган матбуот котиби Метю Миллер матбуот брифингида.
Миллерга кўра, АҚШ расмийлари Грузиядан ушбу қонунни бекор қилишни ҳамда ўз халқи хоҳишига кўра Ғарб томон ҳаракат қилишни кутмоқда. Агар бу амалга ошмаса, Вашингтон қўшимча чоралар қўллашга мажбур бўлади.
“Грузия раҳбарлари ўз ҳаракатларини қайта кўриб чиқиб, ўз халқининг узоқ йиллар давомида билдирилган демократик ва Евро-Атлантика интилишлари билан олға силжиш учун қадам ташлашига умид қиламиз. Аммо улар буни амалга оширмаса, Қўшма Штатлар қўшимча чоралар кўришга тайёр”, — деган Миллер.
АҚШ расмийлари “Грузия орзуси” партиясининг аксилдемократик ҳаракатлари, шунингдек, унинг сўнгги баёнотлари ва риторикасидан қаттиқ хавотирда эканини билдирган. Бу ҳолатлар Грузиянинг Европа билан тақдирини издан чиқариши мумкинлиги айтилган.
Олдинроқ Грузия парламенти спикери Шалва Папуашвили “хорижий агентлар” тўғрисидаги мунозарали қонун лойиҳасини имзолаган эди. Қонунга кўра, молиявий бюджетининг 20% дан ортиғини хориждан оладиган ташкилотлар, жумладан, оммавий ахборот воситалари давлат рўйхатидан ўтишлари шарт. Шунингдек, улар йиллик молиявий ҳисоботларни эълон қилиши талаб қилинган.
2023 йил март ойида илк бор муҳокамага киритилган қонун лойиҳаси 66 кишининг ҳибсга олиниши ва 50 дан ортиқ ҳуқуқ-тартибот ходимларининг жароҳатланиши билан якунланган оммавий норозиликларга сабаб бўлганидан кейин бекор қилинган эди. Аммо апрель ойида лойиҳа парламентга қайта киритилиб, норозилик яна авж олди.
Танқидчилар бу қонунни демократияга путур етказувчи лойиҳа, “Россия қонуни” деб атаган. Грузияда расмийлари эса қонун шаффофликни оширишини таъкидлаган.
Изоҳ (0)