Грузия Ташқи ишлар вазирлиги Россия ҳукуматини Жанубий Осетиядан ҳарбий қисмларни олиб чиқишга чақирди

Грузия Ташқи ишлар вазирлиги 9 июнь куни Россия ҳукуматини Жанубий Осетиядан қуролли кучларини олиб чиқишга чақирган баёнот эълон қилди. Бу ҳақда Грузия ҳукумати манбаларига таяниб, Anadolu хабар берди.

Манбада айтилишича, Грузия Ташқи ишлар вазирлиги Жанубий Осетияда ўтказилган сайловларни ҳам қоралаган. Ҳудуд Грузиянинг узвий қисми эканлигини таъкидлаган.

Вазирлик, шунингдек, Россияни “Грузия суверенитети ва ҳудудий яхлитлигини бузадиган ҳаракатларни тўхтатишга” чақирган. Тбилисидан мустақил бўлишга уринаётган кучларни қўллаб-қувватлашдан тийилишни сўраган.

“Грузиянинг босиб олинган ҳудудларидан ички кўчирилганлар ва қочқинлар ўз уйларига қайтиш имкониятидан маҳрум бўлган, у ерда қолган аҳоли эса ўзларининг асосий ҳуқуқ ва эркинликлари поймол этилган шароитда яшашга мажбур. Шундай бир шароитда ўтказилаётган сайловлар қонуний натижа келтира олмайди. Бу сайловлар халқаро ҳуқуқнинг асосий нормалари ва тамойилларига зиддир”, — дейилади Грузия Ташқи ишлар вазирлиги баёнотида.

Грузия расмийлари Москвани ўзаро келишувларни бажаришга, Грузиянинг халқаро тан олинган ҳудудларидан ҳарбий қисмларини олиб чиқишга чақирган.

“Грузия Ташқи ишлар вазирлиги Россия Федерациясини Грузия суверенитети ва ҳудудий яхлитлигини бузувчи ҳаракатларини тўхтатишга, ўз зиммасига олган халқаро мажбуриятларини, хусусан, Европа Иттифоқи воситачилигида 2008 йил 12 августда эришилган ўт очишни тўхтатиш тўғрисидаги битимни бажаришга ва ўз кучларини Грузия ҳудудидан олиб чиқишга чақиради”, — дея қўшимча қилинган вазирлик баёнотида.

Маълумот ўрнида, 2008 йилда августда Грузия ва Россия ўртасида Абхазия ва Жанубий Осетия бўлгинчи ҳудудлари масаласида можаро рўй берди. Кескинлик кучайиши оқибатида Грузия иккита ҳудуди устидан назоратни йўқотди. Абхазия ва Жанубий Осетия кейинчалик Москва томонидан мустақил давлатлар сифатида тан олинган.

Мамлакат ҳудудий яхлитлигига таҳдид ортидан Грузия Москва билан алоқаларини узди. Жаҳон ҳамжамияти Абхазия ва Жанубий Осетияни ҳали-ҳануз Грузия ҳудуди деб билади.

Жорий йилнинг 9 июнь куни Жанубий Осетияда парламент сайловлари бўлиб ўтган. Тбилиси буни ноқонуний деб атаб, кескин эътирозини билдирган.