Эрон бойитилган уран ишлаб чиқаришни яна оширди — ХАЭА

Эрон халқаро талабларга зид равишда, деярли қуролланиш даражасигача бойитилган уран захираларини яна бир марта оширди. Бу ҳақда Халқаро атом энергияси агентлигининг (ХАЭА) махфий ҳисоботига таяниб, Associated Press хабар берди.

Мутахассислар таъкидлашича, Эрон 60 фоизгача бойитилган 164,7 килограмм уранга эга. Бу ХАЭАнинг май ойидаги дастлабки ҳисоботидан 22,6 килограмм кўпдир. Эронда бойитилган ураннинг умумий захираси 5751,8 килограммни ташкил этади.

60 фоизгача бойитилган уран қурол даражаси ҳисобланган 90 фоиздан атиги қисқа техник қадам масофасида туради. МАГАТЭ маълумотларига кўра, назарий жиҳатдан 60 фоизга қадар бойитилган тахминан 42 килограмм уран, агар материал янада бойитилиб, 90 фоизга етказилса, битта атом бомбасини яратиш учун етарли бўлиши мумкин, дея таъкидлайди мутахассислар.

Атом энергияси бўйича халқаро агентлик (МАГАТЭ) бош директори Рафаэл Гроссига кўра, Эрон атом бомбасини яратиш учун етарли миқдордаги бойитилган уранга эга бўлишидан “ойлар эмас, балки ҳафталар ичида” турибди.

Аввалроқ оммавий ахборот воситалари Эрон ядровий дастури ҳарбий йўналишга эга экани ҳақида хабар берганди. Нидерландия, Швеция, Германия ва Дания разведка хизматларининг маълумотлари Теҳроннинг ядровий қурол яратиш режалари борлигидан далолат беради.