Эрон ҳукумати қамоқдаги Нобель тинчлик мукофоти лауреати Наргис Муҳаммадийни касалхонага ётқизишга рухсат берди.
“Аёл қарийб тўққиз ҳафта давомида соғлиғи билан боғлиқ муаммолардан шикоят қилган”, дея хабар беради Associated Press нашри.
Ҳуқуқ фаолининг тарафдорларига кўра, Муҳаммадийга бир қанча касалликларни комплекс даволаш учун тиббий таътил берилади. Бироқ унинг касалхонага ётқизилиши “бир неча ойлик эътиборсизлик ва маҳрумлик туфайли юзага келган” жиддий муаммоларини ҳал қила олмаслиги маълум қилинган. Аниқлик киритилишича, аёл юрак хасталигидан азият чекмоқда ва сентябрь ойида берилган тиббий хулосага кўра, асосий юрак артерияси билан боғлиқ асоратлар кузатилган.
Наргис Муҳаммадийга 2016 йилда “ўлим жазосини бекор қилишни тарғиб қилувчи инсон ҳуқуқлари ҳаракати”да иштирок этгани учун 16 йиллик қамоқ жазоси тайинланган. Фаол инсон ҳуқуқлари учун курашни 1990 йилларда бошлаган ва жами 13 марта ҳибсга олинган ҳамда беш марта қамоқ жазосига ҳукм қилинган. 2024 йилнинг январида унинг қамоқ муддатига 15 ой, август ойида эса сиёсий маҳбуснинг қатл этилишига норозилик билдиргани учун яна олти ой қўшилган.
Муҳаммадий жазо муддатини Эроннинг Эвин қамоқхонасида ўтамоқда, у ерда сиёсий маҳбуслар ва “ғарб алоқалари” борлар сақланади. 2023 йилда у “Эронда аёлларга нисбатан зулмга қарши кураш ва барча учун инсон ҳуқуқлари ва эркинликларини тарғиб қилишдаги саъй-ҳаракатлари учун” тинчлик бўйича Нобель мукофотига сазовор бўлган.
Изоҳ (0)