АҚШ ва Британия авиакомпаниялари Яқин Шарқда кескинлик юзага келиши ортидан Исроилга парвозларни бекор қилди. Бу ҳақда Ғарб манбаларига таяниб, Anadolu нашри хабар берди.
Манбада айтилишича, Тель-Авив кучлари томонидан Ливандаги “Ҳизбуллоҳ” гуруҳи қўмондони ўлдирилиши Исроил шимолида кескинлик юзага келтириши мумкин. Чунки Ливандаги шиа гуруҳи Исроилдан қасос олишга интилмоқда.
Жорий йилнинг 30 июль куни “Ҳизбуллоҳ” қўмондони Фуад Шукр ҳаво ҳужуми оқибатида ўлдирилган эди. Ҳаракат матбуот котиби хабарни тасдиқлаган ва муносиб жавоб қайтарилишига ваъда берган.
Айни пайтда Эрон ва Ямандаги “Ансоруллоҳ” ҳаракатининг ҳам Исроилга зарба бериш ҳақидаги баёнотлари кучайган. Бунга сабаб эса ҲАМАС сиёсий бюроси раҳбари Исмоил Ҳаниянинг Теҳронда ўлдирилишидир.
Хабарга кўра. дастлаб АҚШнинг United Airlines ва Delta Аir Lines компаниялари Исроилга парвозларни тўхтатган. Кейинроқ эса British Аirways компанияси рейслар тўхтатилганини эълон қилган.
Аввалроқ Австрия, Германия ва Австралия авиакомпаниялари ҳам Исроилга қатновларни тўхтатган эди. Вазият яхши томонга ўзгариши ҳамда чегара можароси барҳам топишига қараб рейслар тикланиши айтилган.
Изоҳ (0)